Զելենսկին հայտարարել է «Կարպատյան ութնյակ» համագործակցության նոր ձևաչափի ստեղծման մասին

Ուկրաինան մեկնարկել է համագործակցության նոր ձևաչափ՝ «Կարպատյան ութնյակ» (C8) անվանմամբ: Այն նպատակ ունի ամրապնդելու տարածաշրջանի երկրների միջև համագործակցությունն անվտանգության, էներգետիկայի և տնտեսության ոլորտներում: «Արմենպրես»-ի փոխանցմամբ՝ այս մասին Զելենսկին հայտնել է իր Telegram ալիքում։

Ըստ նրա՝ Ուկրաինայում առաջին անգամ անցկացվում է Կարպատյան երկրների գագաթնաժողովը՝ միավորելով հարևան երկրների տարածաշրջաններն ու համայնքները: C8 ձևաչափը ներառում է ութ մասնակից՝ Ռումինիան, Սերբիան, Լեհաստանը, Սլովակիան, Չեխիան, Ավստրիան, Հունգարիան և Եվրոպական միությունը՝ որպես ամբողջություն:

Ուկրաինայի նախագահն ընդգծել է, որ այս դաշինքի ստեղծումը միտված է երկրների մերձեցմանը և ընդհանուր մարտահրավերներին դիմակայելու համար նոր հարթակի ձևավորմանը:

«Սա լուրջ սկիզբ է մի շարժման համար, որը կոչված է էլ ավելի մերձեցնելու մեր երկրները և ԵՄ մակարդակով համագործակցության ևս մեկ ամուր օղակ ստեղծելու՝ անվտանգություն, էներգետիկա, լոգիստիկայի և անդրսահմանային տնտեսական համագործակցության զգալի ընդլայնում, ինչպես նաև մեր համայնքներին ցուցաբերվող էական աջակցություն», - ընդգծել է Զելենսկին։

Միջոցառմանը մասնակցել են Լեհաստանի վարչապետ Դոնալդ Տուսկը, Սերբիայի նախագահ Ալեքսանդր Վուչիչը և Ռումինիայի նախագահ Նիկուշոր Դանը։ Համաժողովը կտևի մինչև սեպտեմբերի 20-ը։

Զելենսկու խոսքով՝ ակնկալվում է, որ համաժողովին կմասնակցի շուրջ 550 գործարար, և կստորագրվեն 1 միլիարդ եվրոյի ներդրումային ու առևտրային համաձայնագրեր։