77 միլիոն 884, 9 հազար դրամ՝ Գեղարքունիքի համայնքներում իրականացված սուբվենցիոն ծրագրերի համար
1 րոպեի ընթերցում
ՀՀ կառավարության սեպտեմբերի 17-ի հերթական նիստում որոշում է կայացվել 77 միլիոն 884.9 հազար դրամ հատկացնել Գեղարքունիքի մարզի համայնքների սուբվենցիոն ծրագրերի իրականացման համար։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, 39 միլիոն 54 հազար դրամ հատկացվել է Գեղարքունիքի մարզի Վարդենիս քաղաքի Վ․ Համբարձումյան 17, 19 և Լեռնագործների 1/1, 1/2/ բազմաբնակարան բնակելի շենքերի բակերի ասֆալտապատման աշխատանքների համար, որի շրջանակներում արդեն ասֆալտապատվել է շուրջ 5733 քմ տարածք։
38 միլիոն 830.9 հազար դրամ հատկացվել է Գեղարքունիքի մարզի Մարտունի համայնքի Վարդաձոր բնակավայրում ոռոգման ջրատարի կառուցման աշխատանքների համար։ Արդեն իրականացվել է աշխատանքների շուրջ 80 տոկոսը։ Ծրագրի շրջանակներում կառուցվում է 1,6 կմ երկարության ոռոգման ջրատար, որի արդյունքում Վարդաձոր բնակավայրի ոռոգելի ցանքատարածությունները կավելանան ևս 40 հեկտարով, իսկ ոռոգման ջուրը սպառողներին կմատակարարվի անկորուստ ու ժամանակին։