Ֆինլանդիայի դեսպանը հավատում է, որ ՀՀ-ն ունակ է անվտանգության ոլորտի բարեփոխումների գործում կատարել էական փոփոխություններ

Ընթացիկ տարում ֆինն փորձագետները, ԵՄ ֆինանսավորմամբ, աջակցել են Անվտանգության խորհրդի գրասենյակին՝ Հայաստանի համար պաշտպանության և անվտանգության համապարփակ համակարգ մշակելու հարցում։

«Արմենպրես»-ի հաղորդմամբ՝ այդ մասին «Համապարփակ անվտանգություն և դիմակայունություն» խորագրով երևանյան միջազգային համաժողովում հայտնեց ՀՀ-ում Ֆինլանդիայի արտակարգ և լիազոր դեսպան Կիրստի Նարինեն։

«Ֆինլանդիան այս համաժողովի գործընկերն է դրա սկզբնավորման պահից ի վեր։ Ֆինլանդիան, ինչպես և մյուս բոլոր աջակիցներն ու համահովանավորները, հավատում են անցյալից կտրվելու Հայաստանի և հայերի կարողությանը, անվտանգության ոլորտի լուծումների բարեփոխման գործում էական փոփոխություններ մտցնելու և դրանք առավել եվրոպական դարձնելու կարողությանը։ Այս տարվա ընթացքում ֆինն փորձագետները, ԵՄ ֆինանսավորմամբ, աջակցել են Անվտանգության խորհրդի գրասենյակին՝ Հայաստանի համար պաշտպանության և անվտանգության համապարփակ համակարգ մշակելու հարցում»,- ասաց դեսպանը։

Նրա գնահատմամբ՝ ֆիննական մոդելն անվտանգության ապահովման գործում ողջ հասարակության ներգրավման հարցում դարձել է եվրոպական առաջատար մոդել։ Ողջ Եվրոպան լուծումներ է փնտրում՝ ուղղված անվտանգային փոփոխվող միջավայրին, հիբրիդային սպառնալիքներին, կիբերխափանումներին, մատակարարումների անվտանգությանը, ինչպես նաև հասարակական դիմակայունության և համախմբվածության ամրապնդման անհրաժեշտությանը։

«Չպետք է մոռանանք նաև շրջակա միջավայրի, ջրային ռեսուրսների պահպանման և կլիմայի փոփոխության հետևանքների մեղմման մասին։ Անհրաժեշտ է խորհրդակցել նաև այնպիսի երկրի հետ, ինչպիսին Հայաստանն է, որը գտնվում է մշտական ​​ճնշման ներքո։ Մենք շարունակաբար սովորում ենք միմյանցից։ Այս հայեցակարգի ուժը համագործակցության մեջ է։ Համապարփակ անվտանգությունը ենթադրում է, որ հասարակության կենսական գործառույթները պաշտպանված են բոլոր շահագրգիռ կողմերի միջև հորիզոնական համագործակցության միջոցով։ Ժողովրդավարական ինստիտուտները, պետական ​​մարմինները, բիզնեսը, հասարակական կազմակերպությունները, գիտահետազոտական ​​հաստատություններն ու քաղաքացիները համատեղ են գործում»,- ասաց դիվանագետը։

Նրա դիտարկմամբ՝ համապարփակ և երկարաժամկետ մոտեցումը Ֆինլանդիայի և Հայաստանի նման փոքր ժողովրդավարական պետությունների առանձնահատուկ ուժեղ կողմն է։ Համապարփակ անվտանգությունը նաև աճի և մրցունակության խթան է հանդիսանում։ Կայուն և արդյունավետ գործող հասարակությունը խթանում է ներդրումները, միջազգային համագործակցությունն ու տնտեսական աճը։

«Կանխատեսելիությունն ու կայունությունը պահանջում են լավ գործող ինստիտուտներ, ինչպես նաև ժողովրդավարության, հիմնարար ազատությունների նկատմամբ հարգանքի և ակտիվ քաղաքացիական հասարակության վրա հիմնված հասարակական հավասարակշռություն։ Առանց դրանց՝ անվտանգությունը չի կարող լինել համապարփակ, կայուն կամ կանխատեսելի։ Մինչ Եվրոպական միությունն ու ՆԱՏՕ-ն ամրապնդում են իրենց պատրաստվածությունը, աճում է փորձառության, տեխնոլոգիաների, կրթության և ծառայությունների նկատմամբ պահանջարկը։ Իրազեկվածության բարձրացումը տեսանելիություն է պահանջում։ Դրա գործիքներից մեկը նմանատիպ համաժողովներն են, և սա արդեն երրորդն է։ Այն, ինչ 2024 թվականին սկսվեց որպես փորձնական միջոցառում, վերածվել է բազմաբաղադրիչ նախագծի, որի առանցքում այս ամենամյա համաժողովն է։ Այս երրորդ միջոցառումը վկայում է արդեն իսկ ձևավորված ավանդույթի մասին։ Կարծում եմ՝ մենք արդեն իսկ մեր հետքն ենք թողել ազգային անվտանգության վերաբերյալ քննարկումներում։ Եվրոպական միությունը խթանում է Հայաստանի դիմակայունությունն ու աճը»,- ասաց դեսպանը։

Նա հավելեց, որ յուրաքանչյուր երկիր ունի իր առանձնահատկությունները, ուստի սա չի կարող լինել պարզապես մեխանիկական պատճենման գործընթաց. խոսքը ազգային ներուժի, կարիքների և խոցելի կողմերի սահմանման մասին է։ ԵՄ գործընկերության առաքելությունների՝ վերջերս հաստատված մանդատը հենց այդ նպատակին է ծառայում։

«Այս համաժողովի միջազգային գործընկերներն այստեղ են՝ կիսվելու իրենց փորձով՝ եվրոպական ընդհանուր դիմադրողականություն կառուցելու համար՝ հայկական շեշտադրմամբ։ Համաժողովի մասնակիցների մեծ մասը հայեր են։ Դուք մեծ փորձ ունեք կիսվելու մեզ և միմյանց հետ։ Մեզ ակտիվիստներ են պետք։ Մեզ հոգատար մարդիկ են պետք։ Եվ մեզ պատասխանատու առաջնորդներ են պետք, ովքեր պատրաստ են և կարող են ռազմավարություններ ստեղծել, բայց ավելի շատ՝ ռազմավարություններից գործողությունների անցնել»,- եզրափակեց ՀՀ-ում Ֆինլանդիայի դեսպանը։