2 րոպեի ընթերցում
ՀՀ վարչապետ Նիկոլ Փաշինյանը հայտարարել է, որ Ադրբեջանում պահվող հայ գերիների և անազատության մեջ գտնվող մյուս հայրենակիցների վերադարձի հարցում իր համար սահմանված ժամկետը «րոպե առաջ»-ն է»։
«Արմենպրես»-ի հաղորդմամբ՝ Ազգային ժողովում Կառավարության հետ հարցուպատասխանի ժամանակ «Ուժեղ Հայաստան» խմբակցության պատգամավոր Սյուզաննա Ավետիսյանը վարչապետից հետաքրքրվեց, թե ինչ ժամկետ է նա սահմանել գերիների վերադարձի համար, որից հետո գործընթացը ձախողված կհամարի և հրաժարական կտա։
«Ժամկետը, որ ինձ համար սահմանել եմ, րոպե առաջն է՝ թե՛ գերիների, թե՛ անազատության մեջ գտնվող մեր հայրենակիցների վերադարձի մասով։ Ինչ վերաբերում է հրաժարականին, էլի հիշեցնեմ ձեզ, որ ես 2018 թվականից ի վեր առնվազն երկու անգամ հրաժարական եմ տվել»,- պատասխանեց Փաշինյանը։
Վարչապետի խոսքով՝ խաղաղությունը բազմաշերտ երևույթ է։
«Այսօր դուք ասում եք, որ Հայաստանի՝ մեր 19 հայրենակիցների համար խաղաղությունը չկա, բայց ես ասում եմ, որ միլիոնավորների համար խաղաղությունը կա։ Եվ քանի դեռ միլիոնավորների համար խաղաղությունը կա, ես կհամարեմ, որ խաղաղությունը կա»,- նշեց նա։
Փաշինյանը նաև հավաստիացրեց, որ գերիների վերադարձի ուղղությամբ ամենօրյա աշխատանք է իրականացվում։