2 րոպեի ընթերցում
ԱՄՆ էներգետիկայի նախարար Քրիս Ռայթը հայտարարել է, որ Վաշինգտոնը դեմ է եղել Վիեննայում Ատոմային էներգիայի միջազգային գործակալության (ԱԷՄԳ) ամենամյա խորհրդաժողովին Իրանի միջուկային գերատեսչության ղեկավար Մոհամադ Էսլամիի մասնակցությանը։ «Արմենպրես»-ի փոխանցմամբ՝ այս մասին հաղորդում է France 24-ը։
ԱՄՆ-ի առարկության պատճառով Էսլամիին թույլ չեն տվել մասնակցել ՄԱԿ-ի միջուկային գործակալության ամենամյա խորհրդաժողովին։
«Նա պատժամիջոցների տակ գտնվող անձ է, և մենք չենք ցանկանում, որ պատժամիջոցների ենթարկված անձինք խուսափեն դրանց կիրառումից։ Նա դիմել էր պատժամիջոցներից բացառություն կատարելու խնդրանքով, սակայն այն մերժվել է», - ԱԷՄԳ նստավայրում լրագրողների հետ զրույցում ասել է Ռայթը։
Ի պատասխան՝ Իրանի ԱԳՆ-ն կանչել է Իսլամական Հանրապետությունում Ավստրիայի դիվանագիտական ներկայացուցչության ղեկավարին և վճռական բողոք հայտնել այն պատճառով, որ Վիեննան վիզա չի տրամադրել Իրանի փոխնախագահ, Իսլամական Հանրապետության ատոմային էներգիայի կազմակերպության ղեկավար Մոհամադ Էսլամիին, որը մտադիր էր պատվիրակության հետ մեկնել Ավստրիա՝ ԱԷՄԳ Գլխավոր խորհրդաժողովի 70-րդ նստաշրջանին մասնակցելու համար։