2 րոպեի ընթերցում
Չինաստանը հանդես է գալիս ռուս-ուկրաինական ճգնաժամի կարգավորման ջանքերի օգտին և երկխոսությունը համարում է միակ հնարավոր լուծումը: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Չինաստանի արտաքին գործերի նախարարության պաշտոնական ներկայացուցիչ Գո Ցզյակունը:
«Չինաստանը մշտապես կարծում է, որ երկխոսությունը և բանակցությունները միակ հնարավոր ելքն են ճգնաժամից: Մենք հավանություն ենք տալիս այն բոլոր ջանքերին, որոնք ուղղված են խաղաղության հասնելուն», - ասել է նա ճեպազրույցի ժամանակ՝ մեկնաբանելով այն տեղեկությունները, որ Հնդկաստանի և Չինաստանի ղեկավարները վերջերս Ռուսաստանի նախագահ Վլադիմիր Պուտինին են առաջարկել իրենց ծառայություններն ՌԴ-Ուկրաինա հակամարտության կարգավորմանն աջակցելու համար:
Ինչպես նշել է չինացի դիվանագետը, Պեկինի դիրքորոշումն ուկրաինական ճգնաժամին վերաբերող հարցերի շուրջ «հետևողական է և հստակ»:
Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Հնդկաստանի վարչապետ Նարենդրա Մոդին և Չինաստանի նախագահ Սի Ծինփինը BRICS-ի երկրների ղեկավարների գագաթնաժողովի շրջանակներում Պուտինի հետ իրենց շփումների ընթացքում ակտիվորեն առաջարկել են իրենց ծառայությունները ռուս-ուկրաինական հակամարտության կարգավորմանն աջակցելու համար: