ԱՄՆ նախագահի բանագնացները դրական են գնահատել ուկրաինական պատերազմի հարցով մոսկովյան բանակցությունները
2 րոպեի ընթերցում
ԱՄՆ նախագահի հատուկ բանագնացներ Ջարեդ Քուշները և Սթիվեն Ուիթքոֆը սեպտեմբերի 6-ին Կիևում Ուկրաինայի նախագահ Վոլոդիմիր Զելենսկիի հետ հանդիպումից հետո հայտարարել են խաղաղության բանակցություններում նոր առաջընթացի մասին։ «Արմենպրես»-ի փոխանցմամբ, այս մասին հաղորդում է Reuters լրատվական գործակալությունը։
Քուշներն ու Ուիթքոֆը Կիև էին մեկնել Մոսկվայից, որտեղ նախօրեին երեք ժամ բանակցություններ էին անցկացրել Ռուսաստանի նախագահ Վլադիմիր Պուտինի հետ։
Ուիթքոֆը հայտնել է, որ Մոսկվայում իրենք «նոր գաղափարներ են լսել», սակայն չի մանրամասնել դրանք։ Նրա խոսքով՝ իրենք ակնկալում են, որ ԱՄՆ-ի միջնորդությամբ «շատ շուտով» կհայտարարվի Ուկրաինայի և Ռուսաստանի միջև բանակցությունների նոր փուլը։
«Մոսկվայում մենք մեծ առաջընթաց գրանցեցինք»,- սեպտեմբերի 6-ին Կիևում լրագրողներին ասել է Ուիթքոֆը՝ հավելելով, որ «շատ ոգևորված» է ուկրաինական կողմի հետ ունեցած քննարկումներից։
Զելենսկին դրական է գնահատել Ուիթքոֆի և Քուշների հետ ունեցած «շատ բովանդակալից» զրույցը և հայտարարել, որ Ուկրաինան պատրաստ է եռակողմ բանակցությունների։ Նա նշել է, որ քննարկվել են նաև ՀՕՊ համակարգերի մատակարարումները և ձմռանն ընդառաջ Ուկրաինային էներգետիկ աջակցություն ցուցաբերելու հարցերը։
Զելենսկին հայտնել է նաև, որ պաշտոնյաները քննարկել են Կիևին անվտանգության և տնտեսական երաշխիքներ տրամադրելու հնարավորությունը, ինչպես նաև հետպատերազմյան «բարեկեցության ծրագիրը»։
ԱՄՆ-ի բանագնացները մի քանի ժամ բանակցություններ են անցկացրել ուկրաինացի պաշտոնյաների հետ։ Կիևում գտնվող Մեծ Բրիտանիայի, Ֆրանսիայի և Գերմանիայի ազգային անվտանգության հարցերով խորհրդականները նույնպես միացել են հանդիպման վերջին մեկ ժամին։