Մադուրոն և նրա կինը դիմել են ԱՄՆ դատավորին՝ իրենց նկատմամբ քրեական հետապնդումը դադարեցնելու համար

Պաշտոնանկ արված Վենեսուելայի նախագահ Նիկոլաս Մադուրոն և նրա կինը խնդրել են ԱՄՆ դատավորին չեղյալ համարել իրենց դեմ թմրանյութերի ապօրինի շրջանառության մեղադրանքները՝ հիմնվելով այն բանի վրա, որ նրանք անձեռնմխելիություն ունեն որպես օտարերկրյա պետության ղեկավար և առաջին տիկին։ «Արմենպրես»-ի փոխանցմամբ՝ այս մասին հաղորդում է The Associated Press գործակալությունը։

«ԱՄՆ ոչ մի դատարան երբեք քրեական գործ չի քննել օտարերկրյա առաջնորդի դեմ, որը մեղադրանքների առաջադրման պահին իր երկրում ճանաչվել է որպես պետության ղեկավար…. Պետությունների ղեկավարները չեն կարող հետապնդվել որևէ դատարանում, բացի իրենց սեփական դատարանից», - հայտարարել են Մադուրոյի փաստաբանները։

Պաշտպանությունը նշում է, որ Մադուրոն «կտրականապես հերքում է իր դեմ առաջադրված մեղադրանքները»։

Սեպտեմբերի 2-ին ներկայացված առանձին փաստաթղթերում Մադուրոյի կնոջ՝ Սիլիա Ֆլորեսի փաստաբանները պնդել են, որ նա նույնպես անձեռնմխելիություն ունի ԱՄՆ-ում՝ հիմնվելով ինքնիշխան անձեռնմխելիության սկզբունքի վրա։

Դաշնային դատախազները պաշտպանության կողմի փաստարկներին պետք է պատասխան ներկայացնեն սեպտեմբերի վերջին։ AP-ն հաղորդում է, որ դատավոր Ալվին Հելերշտեյնը նոյեմբերի 17-ին նշանակել է բանավոր լսումներ մեղադրական եզրակացությունը մերժելու միջնորդությունների վերաբերյալ։

Մադուրոն և նրա կինը ներկայում գտնվում են Բրուքլինի դաշնային բանտում։ Եթե գործը կարճելու միջնորդությունը մերժվի, նրանց դատավարությունը կկայանա 2027 թ. հունիսի 1-ին։

Նրանց սպառնում է ցմահ ազատազրկում, եթե ատենակալները համաձայնեն, որ նրանք մասնակցել են ԱՄՆ կոկաին ներմուծելու դավադրությանը։

2026 թ. հունվարի սկզբին ԱՄՆ նախագահ Դոնալդ Թրամփը ռազմական գործողություն է իրականացրել Վենեսուելայի նախագահին պաշտոնանկ անելու համար։ 63-ամյա Մադուրոն և նրա 69-ամյա կինը գիշերվա կեսին ձերբակալվել են ԱՄՆ ուժերի կողմից Կարակասի իրենց տանը և տարվել Նյու Յորք։ Գործողության պաշտոնական պատճառն այն էր, որ Մադուրոն գտնվում էր ԱՄՆ-ի հետախուզվողների ցուցակում։