ԱՄՆ-ի և Իրանի բանակցություններում փակուղու պատճառով տարածաշրջանն անկայուն է դարձել. Եգիպտոսի ԱԳ նախարար

Մերձավոր Արևելքն ավելի անկանխատեսելի է դառնում այն պատճառով, որ ամերիկա-իրանական բանակցությունները փակուղի են մտել: «Արմենպրես»-ի փոխանցմամբ՝ այս մասին հայտարարել է Եգիպտոսի արտաքին գործերի նախարար Բադր Աբդել Աթին։

«Կա խնդիր։ Ինչպես տեսնում եք, այժմ նրանք խաղաղության մեջ չեն, բայց նաև պատերազմական վիճակում էլ չեն», - ասել է նա The National հրատարակությանը՝ խոսելով ԱՄՆ-ի և Իրանի մասին։

Աբդել Աթին կարծիք է հայտնել, որ երկու երկրների միջև բանակցությունները «փակուղի են մտել», ինչը Մերձավոր Արևելքը դարձնում է չափազանց անկայուն և անկանխատեսելի տարածաշրջան։

Նրա խոսքով՝ իրանական կողմն իրեն վստահեցրել է, որ  պատրաստ են հետևել փոխըմբռնման հուշագրին։ Սակայն եգիպտացի նախարարը կարծում է, որ այժմ իրանական կողմի հետ բանակցություններով զբաղվում են ոչ այնքան դիվանագետները, որքան Իսլամական հեղափոխության պահապանների կորպուսը։ Նախարարն ընդգծել է, որ անկախ ամեն ինչից՝ անհրաժեշտ է շարունակել Վաշինգտոնի և Թեհրանի միջև հակամարտության լուծման որոնումները։

Եգիպտոսի ԱԳՆ ղեկավարը հայտարարել է, որ Գազայի հատվածում շարունակվող հակամարտության, Հորմուզի նեղուցի շրջափակման և Կարմիր ծովում եմենցի հութիների կողմից նավերին հասցված հարվածների պատճառով Եգիպտոսի տնտեսությունը դժվարություններ է ապրում և հայտնվել է «կատարյալ փոթորկի» մեջ։

Եգիպտոսը միջնորդներից մեկն է ԱՄՆ-ի և Իրանի միջև բանակցություններում։