2 րոպեի ընթերցում
Կանադայի իշխանությունները մտադիր են աշնանը բանակցություններ սկսել Եվրամիության հետ՝ տնտեսության և անվտանգության ոլորտներում գործընկերային կապերի ամրապնդման շուրջ: «Արմենպրես»-ի փոխանցմամբ՝ այս մասին հայտարարել է Կանադայի վարչապետ Մարկ Քարնին, որի ելույթի տեսանյութը տարածել է Hook Global լրատվական ցանցը։
«Այս աշնանը մենք ակտիվ բանակցություններ կսկսենք Եվրամիության՝ աշխարհի երկրորդ խոշորագույն տնտեսության հետ՝ տնտեսության և անվտանգության բնագավառներում մեր գործընկերային կապերի ամրապնդման շուրջ», - հայտարարել է Կանադայի վարչապետը Քվեբեկի նահանգում ունեցած ելույթի ժամանակ։
Քարնիի խոսքով՝ կանադական ընկերություններն «ունեն դեպի 1,5 միլիարդ սպառողներ անմաքս հասանելիություն»։
«Առաջիկա կես տարում մենք ակնկալում ենք կրկնապատկել այս թիվը՝ ԱՍԵԱՆ-ի (խմբ.՝ Հարավարևելյան Ասիայի պետությունների ասոցիացիա) երկրների և Հնդկաստանի հետ նոր առևտրային գործարքների միջոցով», - նշել է Քարնին։
Նրա խոսքով՝ Կանադան վստահելի և հուսալի գործընկեր է և ունի այն, ինչ պետք է աշխարհին։
Քարնին այս հայտարարությունն արել է Կանադայի և ԱՄՆ-ի միջև առևտրային պատերազմի սրման ֆոնին։ ԱՄՆ նախագահ Դոնալդ Թրամփն օգոստոսի 24-ին Truth Social-ում գրառման մեջ հայտարարել է, որ 2027 թ. հունվարի 1-ից կանադական մեքենաների, բեռնատարների, ավտոպահեստամասերի և պողպատի նկատմամբ մաքսատուրքերը կբարձրանան մինչև 50 տոկոս: Թրամփի խոսքով՝ Կանադայի նկատմամբ այլևս չի լինի այնպիսի վերաբերմունք, ասես այն ԱՄՆ-ի նահանգներից մեկն է:
Վարչապետ Մարկ Քարնին իր հերթին հայտարարել է, որ սեպտեմբերի 8-ից պատասխան մաքսատուրքեր կսահմանի ամերիկյան ապրանքների, այդ թվում՝ պողպատի, կաթնամթերքի, կենցաղային տեխնիկայի և էլեկտրոնիկայի նկատմամբ:
ԱՄՆ-ի և Կանադայի միջև առևտրային բանակցությունները վերջին պահին ձախողվել են, և Վաշինգտոնն օգոստոսի 22-ից 50 տոկոս մաքսատուրքեր է սահմանել մոտ 20 միլիարդ դոլար արժողությամբ կանադական ապրանքների նկատմամբ: