Իրաքը գնահատել է Սիրիայի տարածքով անցնող և Հորմուզի նեղուցը շրջանցող նավթամուղի արժեքը
2 րոպեի ընթերցում
Իրաքից Սիրիայի տարածքով դեպի Միջերկրական ծով նոր նավթամուղի կառուցման նախագիծը, որի նպատակն է նվազեցնել կախվածությունը Հորմուզի նեղուցից, կպահանջի առնվազն չորս տարի և կարժենա 15 միլիարդ դոլար։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։
Ծրագիրը կպահանջի լիովին նոր ենթակառուցվածքի կառուցում՝ գործող խողովակաշարի վերանորոգման փոխարեն։ ԱՄՆ-ի էներգետիկ ընկերությունների ղեկավարները խթանում են տվյալ նախագիծը՝ որպես նավթային ոլորտի՝ Հորմուզի նեղուցից կախվածությունը նվազեցնելու ռազմավարության մաս։ «Chevron» ընկերության մասնակցությամբ ձևավորված կոնսորցիումն արդեն ստացել է նախնական աջակցություն՝ իրագործելիության ուսումնասիրություններ անցկացնելու համար։
Ավելի վաղ ԱՄՆ-ի ֆինանսների նախարար Սքոթ Բեսենթը հայտարարել էր, որ Հորմուզի նեղուցը կարող է կորցնել իր նշանակությունը առաջիկա երկու տարիների ընթացքում։ Նրա խոսքով՝ մինչև պատերազմը նեղուցով էր անցնում նավթի և հեղուկացված բնական գազի համաշխարհային արտահանման մոտ 20%-ը, սակայն այդ ծավալների զգալի մասը ժամանակի ընթացքում կարող է վերաուղղորդվել ցամաքային խողովակաշարերով։
Իրաքը նախկինում Սիրիայի հետ քննարկել էր նաև նոր նավթատարի կառուցման հարցը։ Հունիսին Իրաքի արտաքին գործերի նախարար Ֆուադ Հուսեյնը հայտարարել էր, որ կողմերը դիտարկում են այդ նախագիծը՝ օտարերկրյա ընկերությունների մասնակցությամբ։