2 րոպեի ընթերցում
Իրանի արտաքին գործերի նախարարության խոսնակ Էսմայիլ Բաղային օգոստոսի 17-ին մամուլի ասուլիսում հայտարարել է, որ չնայած եվրոպական երկրները ջանքեր են գործադրում միջնորդության համար, սակայն Իրան-ԱՄՆ բանակցություններում նոր միջնորդ չկա։ «Արմենպրես»-ի փոխանցմամբ՝ այս մասին հաղորդում է IRNA գործակալությունը։
Բաղային ընդգծել է, որ Պակիստանը մնում է Իրանի և Միացյալ Նահանգների միջև հարցերում միջնորդ, և որ Կատարը նույնպես ջանքեր է գործադրում։
Նրա խոսքով՝ չնայած որոշ եվրոպական երկրներ Իրանի հետ իրենց շփումներում արտահայտել են իրենց կարծիքը և պատրաստակամություն են հայտնել առաջարկելու իրենց բարի ծառայությունները, դա լիովին բնական է և չի նշանակում, որ Իրան-ԱՄՆ հարաբերություններին վերաբերող զարգացումներում նոր միջնորդ է ի հայտ եկել։
Նա հավելել է, որ Իրանի և Միացյալ Նահանգների միջև խնդիրը միջնորդության հարց չէ։ Բաղային շեշտել է՝ խնդիրը Վաշինգտոնի մոտեցման, սխալ հաշվարկների մեջ է, ինչպես նաև նրանում, որ Վաշինգտոնը շարունակում է պնդել այնպիսի մեթոդներ և քաղաքականություն, որոնց ձախողումը բազմիցս արձանագրվել է, սակայն ԱՄՆ ղեկավարող մարմինը դեռևս շարունակում է փորձարկել նույն ուղիները։
Բաղայիի խոսքով՝ նման մոտեցումներն, անշուշտ, կհանգեցնեն նույն արդյունքներին, ինչ նախկինում։