Պուտինը և Ալիևը հեռախոսազրույցի ընթացքում ընդգծել են ռուս-ադրբեջանական հարաբերությունների կառուցողական բնույթը

Ռուսաստանի նախագահ Վլադիմիր Պուտինը հեռախոսազրույց է ունեցել Ադրբեջանի նախագահ Իլհամ Ալիևի հետ։ «Արմենպրես»-ի փոխանցմամբ՝ այս մասին հայտնում է Ադրբեջանի նախագահի մամուլի ծառայությունը։

Հեռախոսազրույցի ընթացքում երկու երկրների ղեկավարները քննարկել են երկկողմ հարաբերությունների և միջազգային օրակարգի արդիական հարցերը։

Կողմերն ընդգծել են ռուս-ադրբեջանական հարաբերությունների կառուցողական բնույթը, ինչպես նաև կառավարությունների և ոլորտային գերատեսչությունների մակարդակով երկխոսության ակտիվացումը։

Զրույցի ընթացքում նաև վերահաստատվել է փոխադարձ շահավետ համագործակցության հետագա ընդլայնման հանձնառությունը։

Հուլիսի 27–ին հեռախոսազրույց էին ունեցել նաև Հայաստանի վարչապետ Նիկոլ Փաշինյանն ու Ռուսաստանի նախագահ Վլադիմիր Պուտինը։ Երկու երկրների ղեկավարները մտքեր էին փոխանակել Հայաստան–Ռուսաստան հարաբերությունների օրակարգի, մասնավորապես, երկկողմ տնտեսական հարաբերություններում առաջացած խնդիրների վերաբերյալ։