1 րոպեի ընթերցում
Վրաստանի պետական էլեկտրոցանցը հայտարարել է երկրի տարածքում էլեկտրամատակարարման ամբողջական վերականգնման մասին։
«Արմենպրես»-ի փոխանցմամբ՝ այս մասին հաղորդագրություն է տարածել Վրաստանի առաջին ալիքը։
Նշվում է, որ էներգահամակարգի վերականգնումը սկսվել է վթարի հայտնաբերումից անմիջապես հետո, իսկ վթարի հանգամանքները դեռ պարզվում են։
«Ինտենսիվ և համակարգված ջանքերի արդյունքում սպառողների էլեկտրամատակարարումը կարճ ժամանակահատվածում աստիճանաբար վերականգնվել է։ Պատճառը ներկայումս հետաքննվում է, և մենք հանրությանը լրացուցիչ կտեղեկացնենք»,-ասվում է պետական էլեկտրացանցի հայտարարության մեջ։
Ավելի վաղ հաղորդվել էր, որ Վրաստանում 2 օրվա ընթացքում էլեկտրաէներգիայի արդեն երկրորդ մասշտաբային անջատումն է տեղի ունեցել. հուլիսի 24-ի լույս 25-ի գիշերն առանց լույսի է մնացել գրեթե ամբողջ երկիրը։
Նման իրավիճակ էր տեղի ունեցել նաև հուլիսի 24-ին՝ մոտավորապես ժամը 00:10-ին։ Վրաստանի էլեկտրոցանցում էլեկտրաէներգիայի անջատման պատճառով խափանումներ են տեղի ունեցել էլեկտրաէներգիայի և հեռահաղորդակցության ցանցերում: Արդյունքում, Թբիլիսիում և Վրաստանի շրջանների մեծ մասում էլեկտրաէներգիան ժամանակավորապես անջատվել էր: