Փրկարարները զարգացնում են իրենց մասնագիտական գիտելիքներն ու գործնական հմտությունները

Հայաստանի ներքին գործերի նախարարության փրկարար ծառայության Երևան քաղաքի փրկարարական վարչության ենթակա ջոկատների ծառայողների մասնակցությամբ հունիսի 29-ից հուլիսի 3-ը Ռուս-հայկական մարդասիրական արձագանքման կենտրոնում անցկացվել է «Գազածխապաշտպանների սկզբնական պատրաստություն» թեմայով վերապատրաստման դասընթաց։

«Արմենպրես»-ի փոխանցմամբ՝ այս մասին հաղորդագրություն է տարածել ՀՀ ՆԳՆ փրկարար ծառայությունը։

Դասընթացի ընթացքում փրկարարները ծանոթացել են գազածխապաշտպան սարքավորումների կառուցվածքին և շահագործման կանոններին, խորացրել անվտանգության կանոնների վերաբերյալ գիտելիքները և կատարել գործնական վարժություններ՝ ծխով ու թունավոր գազերով լցված միջավայրում գործելու հմտությունները զարգացնելու նպատակով։

Անդրադարձ է կատարվել նաև արտակարգ իրավիճակներում անձնակազմի անվտանգության ապահովման և փոխօգնության սկզբունքներին։

Նմանատիպ դասընթացները նպաստում են փրկարարների մասնագիտական պատրաստվածության կատարելագործմանը և բարդ պայմաններում արդյունավետ ու անվտանգ գործելու կարողությունների զարգացմանը։