2 րոպեի ընթերցում
Հոդվածը հրապարակվում է «Արմենպրես»-ի և BTA-ի միջև ստորագրված համաձայնագրի շրջանակում։
Բուլղարիայի աշխատանքի և սոցիալական քաղաքականության փոխնախարար Դանաիլ Ռուսևը հուլիսի 6-ին Սոֆիայում բացել է «Եվրոպական արժեքների պաշտպանության համար. քաղաքացիական հասարակության ուժը» խորագրով երկօրյա միջազգային սեմինարը։ «Արմենպրես»-ի փոխանցմամբ՝ այս մասին հաղորդում է BTA գործակալությունը։
Փոխնախարարը նշել է, որ պետությունը և քաղաքացիական հասարակությունը նույն փոփոխության երկու շարժիչ ուժերն են։ Նրա խոսքով՝ երբ պետությունը և քաղաքացիական հասարակությունը ներդաշնակորեն աշխատում են, տնտեսական օգուտները և ժողովրդավարական արժեքները վերածվում են քաղաքացիների համար շոշափելի արդյունքի։
Անդրադառնալով արհեստական բանականությանը (ԱԲ)՝ Ռուսևը մեջբերել է ամերիկյան երկու վերլուծական ընկերության՝ 21 000 բիզնես ընդգրկող զեկույցը, ըստ որի՝ ԱԲ-ում ավելի շատ ներդրումներ կատարող ընկերությունները երկարաժամկետ հեռանկարում հակված են ավելի շատ մարդկանց վերցնել աշխատանքի։
«Հիմնական խնդիրն այն է, որ ապահովվի, որ բնական բանականությունը պատրաստ լինի աշխատել արհեստական բանականության հետ։ Սա պետական հաստատությունների և քաղաքացիական հասարակության համատեղ պատասխանատվությունն է», - նշել է Ռուսևը։
Սեմինարն անցկացվում է Սոֆիայի համալսարանում և կազմակերպվում է Բուլղարիայի տնտեսական և սոցիալական խորհրդի, Բուլղարիայում Եվրոպական խորհրդարանի կապի գրասենյակի և Բուլղարիայում Եվրոպական հանձնաժողովի ներկայացուցչության կողմից։