Այսօր Հայաստանն ու Ադրբեջանն ապրում են խաղաղության մեջ. Ալիևը շնորհավորել է Թրամփին ԱՄՆ անկախության 250-ամյակի առթիվ
2 րոպեի ընթերցում
Ադրբեջանի նախագահ Իլհամ Ալիևը ԱՄՆ-ի անկախության 250-ամյակի առթիվ շնորհավորել է Դոնալդ Թրամփին՝ միաժամանակ շնորհակալություն հայտնելով նաև Հարավային Կովկասում՝ մասնավորապես Հայաստանի ու Ադրբեջանի միջև խաղաղության օրակարգն առաջ մղելու համար:
«Արմենպրես»-ի հաղորդմամբ՝ համապատասխան շնորհավորական ուղերձը Ալիևը տարածել է X-ի իր միկրոբլոգում:
«Մենք մեր խորը գնահատանքն ենք հայտնում Հարավային Կովկասում խաղաղության օրակարգը առաջ մղելու և տարածաշրջանում կայուն զարգացումը խթանելու Ձեր վճռական ջանքերի համար: Անցյալ տարի օգոստոսի 8-ին Ձեր նախաձեռնությամբ Սպիտակ տանը կայացած պատմական եռակողմ հանդիպման արդյունքները մեր տարածաշրջանում ստեղծել են բոլորովին նոր և դրական մթնոլորտ: Այսօր Ադրբեջանն ու Հայաստանն ապրում են խաղաղության մեջ և կառուցում են առևտրային հարաբերություններ»,-գրել է Ադրբեջանի նախագահը:
Նա նաև հատուկ նշել է ԱՄՆ-ի դերն ու շարունակական աջակցությունը տարածաշրջանային կայունությանը և տնտեսական զարգացմանը նպաստող ենթակառուցվածքային նախագծերի իրականացմանը, մասնավորապես՝ «Թրամփի ուղի՝ հանուն միջազգային խաղաղության և բարգավաճման» նախագիծը, որն, ըստ Ալիևի, կապահովի Ասիայի և Եվրոպայի միջև այլընտրանքային, հուսալի և անվտանգ կապ:
Նա իր գրառման մեջ նաև հույս է հայտնել, որ Վաշինգտոնի և Բաքվի միջև տարբեր ոլորտներում համագործակցությունը կընդլայնվի:
Dear Mr. President,
— Ilham Aliyev (@presidentaz) July 4, 2026
It is on my behalf and on behalf of the people of Azerbaijan that I am delighted to extend my heartfelt congratulations and best wishes to you, and through you to the friendly people of the United States, on the historic occasion of the 250th anniversary of… pic.twitter.com/f2zm43bXcp