Ռուբեն Ռուբինյանը Երևանի խցանումների խնդրի լուծումը կապում է հանրային տրանսպորտի բարելավման հետ
2 րոպեի ընթերցում
Ազգային ժողովի նախագահի տեղակալ Ռուբեն Ռուբինյանը Երևանի խցանումների պատճառներից է համարում վերջին տարիներին Հայաստանում ավտոմեքենաների թվի կտրուկ աճը։
«Արմենպրես»-ի հաղորդմամբ՝ Ռուբինյանն այս մասին ասաց լրագրողների հետ զրույցում։
Նրա խոսքով՝ ավտոմեքենաների թվի աճը պայմանավորված է նաև մարդկանց բարեկեցության բարձրացմամբ։
«Երևանում խցանումներ են, որովհետև վերջին տարիներին ավտոմեքենաների թիվը Հայաստանում կտրուկ աճել է։ Ինչո՞ւ է աճել, որովհետև մարդկանց բարեկեցությունը նույնպես աճել է»,- ասաց Ռուբինյանը։
ԱԺ փոխնախագահի խոսքով՝ կան հաշվարկներ, որոնց համաձայն՝ վերջին տասը տարում Հայաստանում ավտոմեքենաների թիվը գրեթե կրկնապատկվել է։
Ռուբինյանն ընդգծեց, որ դա բնական գործընթաց է, սակայն այն առաջացնում է խնդիրներ, այդ թվում՝ խցանումներ։
Նա հիշեցրեց, որ ստեղծվել է հատուկ հանձնաժողով, որը պետք է զբաղվի այդ խնդիրներով։
Անդրադառնալով քաղաքում իրականացվող վերանորոգման աշխատանքներին՝ Ռուբինյանը նշեց, որ դրանք ևս որոշակի անհարմարություններ են առաջացնում, սակայն անհրաժեշտ են։
«Վերանորոգումները պետք է լինեն, և բնականաբար, դրանք ինչ-որ անհարմարություն են բերում։ Պետք է այդ անհարմարություններին դիմանալ»,- ասաց նա։
ԱԺ փոխնախագահի խոսքով՝ խցանումների խնդիրը չի սահմանափակվում միայն վերանորոգումներով, և անհրաժեշտ են համակարգային լուծումներ։
Ռուբինյանը նշեց, որ լուծումների թվում են հանրային տրանսպորտի համակարգի բարելավումը, շարժակազմերի ավելացումը, ինչպես նաև գոտիավորման անհրաժեշտությունը։
«Այս խնդիրը կա, ես չեմ ժխտում»,- ընդգծեց Ռուբինյանը։