2 րոպեի ընթերցում
ԱՄՆ նախագահ Դոնալդ Թրամփը CNBC-ի հետ հարցազրույցում ասել է, որ շնորհավորել է ձեռնարկատեր Իլոն Մասկին տրիլիոնատեր դառնալու կապակցությամբ, տեղեկացնում է «Արմենպրես»-ը։
Թրամփը նշել է, որ չի զրուցել Մասկի հետ, սակայն երկտող է ուղարկել։
«Ես նրան գրել եմ. «Շնորհավորում եմ, շատ լավ է»», - ասել է Թրամփը։
Նա նշել է, որ շատ լավ հարաբերություններ ունի Մասկի հետ, սակայն իրենց միջև տարաձայնություններ են եղել, քանի որ վարչակազմը մերժել է նախաձեռնությունը, որով պետք է բոլոր ամերիկացիներին պարտադրվեր անցնել էլեկտրական մեքենաների։
«Իլոնը դրանից ոգևորված չէր։ Եվ ես կարող եմ հասկանալ դա։ Բայց նա լավ է», - ասել է Թրամփը։
Մասկը, որ աշխարհի ամենահարուստ մարդն է, տրիլիոնատեր էր դարձել հունիսի 12-ին իր SpaceX ավիատիեզերական ընկերության հրապարակային առաջարկի (IPO, Initial Public Offering) շնորհիվ, որի արդյունքում վաճառքի էր հանվել 555,6 միլիոն բաժնետոմս, և ընկերության արժեքը գնահատվել էր 2 տրիլիոն դոլար։
Սակայն հունիսի 24-ին Մասկը զրկվեց տրիլիոնատիրոջ կարգավիճակից SpaceX-ի բաժնետոմսերի գնի անկման պատճառով։ Իրական ժամանակում թարմացվող Bloomberg-ի միլիարդատերերի ինդեքսի վերջին տվյալներով՝ Մասկի զուտ կարողությունը հուլիսի 3-ի դրությամբ կազմում է 992 միլիարդ դոլար։
Forbes ամսագրի տվյալներով՝ Մասկի զուտ կարողությունը 2025 թվականին կազմել է 342 միլիարդ դոլար՝ 2024 թվականի 195 միլիարդ դոլարի համեմատ։