Հայաստանը հյուսիսային երթուղու իրագործման շուրջ աշխատում է ԵՄ-ի հետ. Փաշինյան

Հայաստանն ապաշրջափակման թեմայով աշխատում է Եվրոպական միության հետ, մասնավորապես՝ հյուսիսային երթուղու իրագործման շուրջ։ «Արմենպրես»-ի հաղորդմամբ՝ այս մասին լրագրողների հետ ճեպազրույցում ասաց ՀՀ վարչապետ Նիկոլ Փաշինյանը։

Վարչապետի խոսքով՝ հետազոտությունները ցույց են տվել, որ Արևելք-Արևմուտք ամենակարճ ճանապարհն անցնում է Հայաստանի Տավուշի, Լոռու և Շիրակի մարզերով։

«Մենք այդ նախագծի իրագործման շուրջ աշխատում ենք Եվրոպական միության հետ»,- նշեց Փաշինյանը։

Նրա խոսքով՝ ծրագրի իրականացման ամենապարզ տարբերակը Ղազախ-Իջևան-Վանաձոր-Գյումրի-Ախուրիկ ավտոմոբիլային ճանապարհները միջազգային բեռնատարների համար վճարովի հիմունքներով բացելն է։

Փաշինյանը նշեց, որ ծրագիրը հեշտ իրագործելի է, սակայն դրա համար անհրաժեշտ են քաղաքական պայմանավորվածություններ։

«Պետք է քաղաքական պայմանավորվածությունները ձեռք բերվեն և իրագործվեն։ Իհարկե, նաև Հայաստան-Թուրքիա սահմանի բացումը պետք է տեղի ունենա»,- ասաց վարչապետը։

Նրա գնահատմամբ՝ ծրագիրը կարող է տարածաշրջանային մեծ հետաքրքրություն ներկայացնել։

Վարչապետը հավելեց, որ Ախուրիկում ճանապարհի փոքր հատված կառուցելու անհրաժեշտություն կլինի, սակայն դա իրագործելի է։