1 րոպեի ընթերցում
Գեղարքունիքի մարզի Մարտունի քաղաքում կայացել է բռնցքամարտի «Սևանա լիճ 2026» 10-րդ բաց առաջնությունը, որը Մարտունիի մարզադպրոցի հետ համատեղ կազմակերպել էր Գեղարքունիքի մարզի բռնցքամարտի ֆեդերացիան։
Ինչպես «Արմենպրես»-ին տեղեկացրեց Գեղարքունիքի մարզի բռնցքամարտի ֆեդերացիայի նախագահ Գևորգ Սարգսյանը, Մարտունիի մարզադպրոցը մեկ հարկի տակ էր հավաքել 2008-2018 թվականներին ծնված 210 ուժեղագույն մարզիկի Մարտունիից, Երևանի «Դինամո» ՄՀԿ-ից, Եղեգնաձորից, Ալավերդիից, Քաջարանից, Կապանից, Արտաշատից, Հրազդանից, Վայքից, Փարաքարից, Սևանից և այլ համայնքներից։
Թիմային արդյունքներով առաջին տեղը զբաղեցրել է Մարտունիի մարզադպրոցը, երկրորդ տեղը՝ Եղեգնաձոր համայնքը, երրորդ տեղը՝ Երևանի «Դինամո» մարզական հասարակական կազմակերպությունը։
Հաղթող մարզիկները և մրցանակային տեղեր գրաված թիմերը պարգևատրվել են գավաթներով, մեդալներով ու պատվոգրերով։