1 րոպեի ընթերցում
Ֆրանսիայի նախագահի հաջորդ ընտրությունները տեղի կունենան 2027 թվականի ապրիլի 18-ին։ Եթե թեկնածուներից ոչ մեկը չկարողանա ստանալ ձայների մեծամասնությունը, ապա ընտրությունների երկրորդ փուլ կանցկացվի մայիսի 2-ին։ Ինչպես հաղորդում է «Արմենպրես»-ը, այս մասին գործադիր իշխանությունից աղբյուրը հայտնել է France24-ին։
Ակնկալվում է, որ նախագահական ընտրությունների ժամկետները պաշտոնապես կհաստատվեն հուլիսի 1-ին նախարարների խորհրդում։
Մարին Լը Պենի ղեկավարած «Ազգային միավորում» կուսակցությունն այս ընտրությունները դիտարկում է որպես իշխանության հասնելու իր՝ մինչ այժմ ունեցած ամենամեծ հնարավորությունը։
Հարցումները բազմիցս ցույց են տալիս, որ ծայրահեղ աջակողմյան այս ուժը կարող է առաջատար լինել 2027 թվականի ընտրությունների առաջին փուլում։ Այդուհանդերձ, դեռևս պարզ չէ, թե ով կլինի կուսակցության թեկնածուն։
Լը Պենը հույս ունի առաջադրվել նախագահի պաշտոնում չորրորդ անգամ՝ այն բանից հետո, երբ 2012-ին զբաղեցրել է երրորդ տեղը, իսկ հետագայում երկու անգամ հասել է նախագահական ընտրությունների երկրորդ փուլ՝ մրցելով գործող նախագահ Էմանուել Մակրոնի հետ, ով այժմ ավարտում է իր երկրորդ և վերջին ժամկետը։