2 րոպեի ընթերցում
Ադրբեջանի նախագահ Իլհամ Ալիևը հունիսի 24-ին ընդունել է Թուրքիայի ազգային մեծ ժողովի նախագահ Նուման Քուրթուլմուշի գլխավորած պատվիրակությանը։
Ինչպես հաղորդում է «Արմենպրես»-ը, այս մասին հայտնում է ադրբեջանական APA լրատվական գործակալությունը:
Ալիևը կարևորել է Քուրթուլմուշի մասնակցությունը Բաքվում անցկացվող Իսլամական համագործակցության կազմակերպության անդամ պետությունների խորհրդարանական միության 20-րդ նստաշրջանին։
Ադրբեջանի նախագահը նշել է, որ ապագայում ևս երկրում կանցկացվեն միջոցառումներ Իսլամական համագործակցության կազմակերպության շրջանակում և ընդգծել է իսլամական երկրների միջև կապերի հետագա ընդլայնման կարևորությունը։
Նուման Քուրթուլմուշն իր հերթին շնորհակալություն է հայտնել ընդունելության և համաժողովի բարձր մակարդակով կազմակերպման համար:
Հանդիպման ընթացքում կողմերը կարևորել են Բաքվում անցկացվող համաժողովը՝ որպես Իսլամական համագործակցության կազմակերպության շրջանակում գործընկերության ամրապնդման հարթակ։
Կողմերը նշել են, որ Ադրբեջանի և Թուրքիայի միջև եղբայրական ու դաշնակցային հարաբերությունները հաջողությամբ զարգանում են տարբեր ուղղություններով, այդ թվում՝ միջխորհրդարանական համագործակցության ոլորտում։
Հանդիպման մասնակիցները քննարկել են նաև երկու երկրների օրենսդիր մարմինների համագործակցության և դրա հետագա ընդլայնման հեռանկարները։