Ապատեղեկատվության դեմ պայքարից մինչև մեդիայի վրա արհեստական բանականության ազդեցություն. Բոննում մեկնարկել է Գլոբալ մեդիա ֆորումը

Գերմանիայի Բոնն քաղաքում հունիսի 23-ին մեկնարկել է Deutsche Welle-ի (DW) կազմակերպած երկօրյա Գլոբալ մեդիա ֆորումը՝ համախմբելով լրագրողների, մեդիա կազմակերպությունների ղեկավարների, քաղաքական գործիչների, փորձագետների և քաղաքացիական հասարակության ներկայացուցիչների՝ աշխարհի ավելի քան 110 երկրներից։

Բոննից «Արմենպրես»-ի թղթակցի հաղորդմամբ՝ այս տարի ֆորումը կրում է «Journalism Out Loud» («Լրագրությունը՝ բարձրաձայն») խորագիրը: Միջոցառման շրջանակում մասնակիցները քննարկելու են ժամանակակից լրագրության առջև ծառացած հիմնական մարտահրավերները՝ ապատեղեկատվության տարածումը, արհեստական բանականության ազդեցությունը մեդիայի վրա, խոսքի և մամուլի ազատության պաշտպանությունը, լրագրողների անվտանգությունը և անկախ լրատվամիջոցների դերը ժողովրդավարական հասարակությունների պահպանման և ամրապնդման գործում։

Ֆորումի բացմանը ելույթով է հանդես եկել DW-ի գլխավոր տնօրեն Բարբարա Մասինգը՝ ընդգծելով, որ «Journalism Out Loud» խորագիրն ընտրվել է ոչ թե այն պատճառով, որ լրագրությունը պետք է ավելի բարձրաձայն դառնա, այլ որովհետև այն պետք է շարունակի լսելի մնալ մի աշխարհում, որը գնալով ավելի աղմկոտ է դառնում, իսկ բոլորին հայտնի աշխարհակարգն արմատական փոփոխություններ է կրում։

«Լրագրությունը պետք է վերականգնի մարդկանց միավորելու իր կարողությունը և վերահաստատի ազատ մեդիայի կենսական դերը մեր հասարակություններում»,- ասել է նա։

Մասինգի խոսքով՝ ֆորումի գլխավոր նպատակն է տարբեր երկրներից եկած մարդկանց միավորել երկխոսության շուրջ՝ քննարկելու լրագրության ապագան և ոլորտի առջև ծառացած մարտահրավերները։

DW-ի գլխավոր տնօրենը հատուկ անդրադարձ է կատարել ապատեղեկատվության տարածման խնդրին՝ նշելով, որ աշխարհն այսօր ականատես է լինում հանրային քննարկումների վրա ազդելու և ժողովրդավարական հասարակությունները ապակայունացնելու նպատակով ապատեղեկատվության կանխամտածված կիրառմանը։

«Մենք ականատես ենք խորը փոփոխությունների։ Տեղեկատվական դաշտում աճում է ապատեղեկատվության կիրառումը, այդ թվում՝ պետական վերահսկողության ներքո գործող դերակատարների կողմից, իսկ տեխնոլոգիական հարթակների ալգորիթմները հաճախ մեծացնում են բովանդակության տարածումը՝ անկախ դրա փաստական ճշգրտությունից»,- ընդգծել է նա։

Մասինգի բնորոշմամբ՝ ժամանակակից լրագրության կարևորագույն խնդիրներից մեկը հանրային վստահության պահպանումն է։

Քանի որ Ֆորումի ընթացքում անդրադարձ է կատարվելու նաև լրագրողների անվտանգության հարցերին, Մասինգը նշել է, որ աշխարհում աճում են լրագրողների նկատմամբ ճնշումները, հետապնդումները և սպառնալիքները։

«Լրագրությունը քաջություն է պահանջում, և ես հպարտ եմ, որ այսօր այս դահլիճում հավաքվել են մարդիկ, որոնք պատրաստ են պաշտպանել լրագրության ապագան»,- շեշտել է նա։

Գլոբալ մեդիա ֆորումը համարվում է մեդիայի, լրագրության և հանրային հաղորդակցության ոլորտներում ամենահեղինակավոր միջազգային հարթակներից մեկը։ Այն ամեն տարի միավորում է աշխարհի տարբեր երկրների ներկայացուցիչների՝ քննարկելու խոսքի ազատության, ժողովրդավարության, տեխնոլոգիաների և տեղեկատվական անվտանգության հետ կապված արդիական հարցեր։