Thales-ը և BooTech-ը հայտարարել են տարածաշրջանային անվտանգության ամրապնդմանն ուղղված գործընկերության մասին

Ֆրանսիական առաջատար «Thales» և հայկական պաշտպանական տեխնոլոգիաների «BooTech» ընկերությունները հայտարարել են արդյունաբերական գործընկերության մեկնարկի մասին, որը միտված է ռազմավարական համագործակցության խորացմանն ու տարածաշրջանային անվտանգության ամրապնդմանը։

Համաձայնագրի շրջանակում BooTech-ը կգործի որպես արդյունաբերական գործընկեր՝ մարտական գործողությունների կառավարման համակարգերի, թվային ենթակառուցվածքների, կիբեռանվտանգության և հարակից ուղղություններով։

Միևնույն ժամանակ Thales-ը կկիսվի իր արտադրական փորձով եւ տեխնոլոգիաներով, իսկ BooTech-ը ջանքերը կուղղի համակարգերի ինտեգրման և ցանցային լուծումների ուղղությամբ։ 

Դեռևս 2019 թվականին հիմնադրված BooTech-ը մշակում է մարտի կառավարման, հետախուզության, դիտարկման և հետախուզական տվյալների հավաքագրման թվային համակարգեր՝ նպատակ ունենալով միավորել գործող և հաջորդ սերնդի զինատեսակները, բարձրացնել գործողությունների արագությունն ու արդյունավետությունը, զուգահեռաբար՝ նվազեցնելով ծախսերը։

Գործընկերության նպատակն է ստեղծել փոխհամատեղելի լուծումներ, որոնք կապահովեն բազմատիրույթ միջավայրերի համատեղ աշխատանքը և կնպաստեն Հայաստանում բարձր որակավորում պահանջող աշխատատեղերի ստեղծմանը։

«Thales-ի համաշխարհային արդյունաբերական ներուժի և BooTech-ի ինտեգրացիոն կարողությունների համադրությունը կարագացնի համատեղ լուծումների տրամադրումն ինչպես Հայաստանի, այնպես էլ աշխարհի այլ երկրների զինված ուժերին»,- ասել է Thales-ի Եվրոպայի գծով ավագ փոխնախագահ Մարկ Դարմոնը՝ հավելելով, որ այս համագործակցությունը կնպաստի եվրոպական անվտանգությանը, իսկ Հայաստանի և ԵՄ-ի մերձեցման ֆոնին, այն կարող է ապահովել, որպեսզի ներդրումներից շահեն երկու կողմերի տնտեսություններն ու ժողովուրդները։

BooTech-ի գլխավոր տնօրեն Աշոտ Ղուկասյանի խոսքով՝ ռազմավարական գործնկերության համաձայնագիրը, վստահության կարևոր արտահայտություն է։

«Միասին մենք կառուցում ենք սուվերեն պաշտպանական արդյունաբերություն, որը նպաստում է տարածաշրջանային կայունության ամրապնդմանը և զարգացնում մեր տեխնոլոգիական ինքնաբավությունը»,- նշել է նա։

Գործընկերությունը վկայում է ֆրանս-հայկական ռազմավարական համագործակցության շարունակական զարգացման մասին։

Այն նաև ընդգծում է պաշտպանության, արհեստական բանականության և կիբեռանվտանգության ոլորտներում երկու երկրների միջև կապերի խորացման մեջ գործարար համագործակցության դերը։

Thales-ի մասին

Thales-ն համաշխարհային առաջատար ընկերություն է պաշտպանական, ավիատիեզերական, կիբեռանվտանգության և թվային տեխնոլոգիաների ոլորտներում։

Ընկերության նորարարական արտադրանքներն ու ծառայությունները նպաստում են մի շարք կարևոր մարտահրավերների հաղթահարմանը, այդ թվում՝ ինքնիշխանության, անվտանգության, կայուն զարգացման և ներառականության ոլորտներում։

Thales-ը տարեկան 4.5 միլիարդ եվրո է ներդնում հետազոտությունների և մշակումների մեջ՝ հատկապես արհեստական բանականության, կիբեռանվտանգության, քվանտային և ամպային տեխնոլոգիաների ուղղություններով։

Ընկերությունն ունի ավելի քան 85 հազար աշխատակից 65 երկրում։ 2025 թվականին Thales-ի վաճառքի ծավալը կազմել է 22.1 միլիարդ եվրո։

BooTech-ի մասին

BooTech-ը հայկական պաշտպանական տեխնոլոգիաների ընկերություն է, որը տրամադրում է առաջադեմ C2/C4ISR թվային լուծումներ՝ գործող և հաջորդ սերնդի համակարգերը միավորելով ցանցային մարտադաշտի կառավարման հարթակներում։

BooTech-ի լուծումները ձևավորում են միասնական օպերատիվ պատկեր, որը հնարավորություն է տալիս իրականացնել բազմատիրույթ գործողություններ և ապահովում է առաքելությունների ավելի արագ, արդյունավետ և տեղեկացված իրականացում։

Հայաստանի զինված ուժերի համակարգերի ինտեգրատորը հանդիսացող BooTech-ը Thales-ի առանցքային արդյունաբերական գործընկերն է Հայաստանում և համագործակցում է պաշտպանության ոլորտի առաջատար միջազգային ընկերությունների հետ՝ ստեղծելով փոխհամատեղելի համակարգեր, որոնք միավորում են ավանդական և ժամանակակից հնարավորությունները։

Հազարավոր օգտատերեր ունեցող և իրական գործառնական միջավայրերում ապացուցված արդյունավետությամբ BooTech-ը նպաստում է առաքելությունների արդյունավետության բարձրացմանը, տարածաշրջանային անվտանգության ամրապնդմանը և խաղաղությանը։