1 րոպեի ընթերցում
Լոռիում շարունակվում են անչափահաս 2 երեխաների որոնողական աշխատանքները։ Ներգրավված են մեծ թվով փրկարարներ և ոստիկաններ։ «Արմենպրես»-ին այս մասին տեղեկացրին Հայաստանի ներքին գործերի նախարարությունից՝ նշելով, որ որոնվող երեխաները 7 և 13 տարեկան քույրեր են։
«Առաջին ահազանգը եղել է հունիսի 15-ին ժամը 14։45-ին։ Քաղաքացին հայտնել էր, որ տեսել է Փամբակ գետում հայտնված երեխայի։ Նույն օրը ժամը 17։05-ին մեկ այլ քաղաքացի է ահազանգել ու հայտնել, որ 7 և 13 տարեկան քույրերը Վանաձոր քաղաքի Նարեկացի փողոցի հասցեներից մեկից դուրս են եկել և չեն հասել նախատեսված վայր»,– մանրամասնեցին ՆԳՆ-ից:
Կառույցից նաև հայտնեցին, որ լրատվամիջոցներում տարածված տեղեկությունները, թե երեխաները արցախցի են, չի համապատասխանում իրականությանը։
Որոնողական աշխատանքները չեն դադարել ամբողջ գիշերվա ընթացքում։ Ներգրավված է 115 փրկարար և 86 ոստիկան։
Ներգրավվել են նաև կամավորներ, ջրասուզակներ։ Օգտագործվում են անօդաչու թռչող սարքեր, նավակներ ու այլ տեխնիկական միջոցներ։