1 րոպեի ընթերցում
Անգլիայի ֆուտբոլի հավաքականն ԱՄՆ-ում անվտանգության խափանման զոհ է դարձել․ Կանզաս Սիթիում կայանալիք Աշխարհի առաջնության առաջին խաղին ընդառաջ մարզումից առաջ գողացել են թիմի խաղային կոշիկները, մարզումների համար նախատեսված գնդակներն ու այլ անհրաժեշտ պարագաներ։
«Արմենպրես»-ի փոխանցմամբ՝ այս մասին հայտնում են բրիտանական լրատվամիջոցները։
Նշվում է, որ գողությունը տեղի է ունեցել այն ժամանակ, երբ սարքավորումները թիմի Ֆլորիդայի նախամրցաշարային բազայից տեղափոխվում էին Միսուրի նահանգի Սվոուփ Ֆուտբոլային գյուղի մարզական ճամբար։
Նշվում է, որ Կանզաս Սիթիի ոստիկանությունը հետաքննում է միջադեպը և հաստատել է, որ երկու կասկածյալներ ձերբակալվել են:
Ոստիկանության խոսնակը Guardian-ին ասել է. «Կասկածվող երկու անձ ձերբակալվել է՝ հետագա քննության համար»:
Հավաքականի անձնակազմը հրատապ կարգով փորձում է գողացված իրերը փոխարինել, որպեսզի Խորվաթիայի դեմ հունիսի 17-ին կայանալիք խաղի նախապատրաստությունը չձախողվի։
Աշխարհի առաջնությունն անցկացվում է ԱՄՆ-ում, Մեքսիկայում և Կանադայում՝ հունիսի 11-ից հուլիսի 19-ը։ Անգլիայի հավաքականը խմբային փուլում կմրցի Խորվաթիայի, Գանայի և Պանամայի հավաքականների հետ։