«Հայաստան» դաշինքը հանրահավաք է անցկացրել Հրազդանում

Նախընտրական քարոզչության շրջանակներում «Հայաստան» դաշինքը հանրահավաք է անցկացրել Հրազդան քաղաքի Սահմանադրության հրապարակում։ «Արմենպրես»-ի հաղորդմամբ՝ «Հայաստան» դաշինքի ներկայացուցիչները հանրահավաքի ընթացքում ներկայացրել են երկրի արտաքին, ներքին ու անվտանգային խնդիրների լուծման իրենց տեսլականը։

Քաղաքական ուժի առաջնորդ, ՀՀ երկրորդ նախագահ Ռոբերտ Քոչարյանը համոզմունք է հայտնել, որ Հայաստանը կարող է ապրել հանգիստ պայմաններում և շատ լավ հարաբերություններ ունենալ բոլոր երկրների, այդ թվում՝ հարևանների հետ։ Նրա խոսքով՝ լավ հարաբերությունները նաև արժանապատիվ հարաբերություններն են։

«Մենք կարող ենք այնպես անել, որ Հայաստանը վերադարձնի հարգանքն այլ երկրների կողմից։ Սա մեզ պետք է։ Այս տարածաշրջանում այլ կերպ կայանալ որպես պետություն, հնարավոր չէ, թե չէ մեզ փայ-փայ են անելու իրար մեջ»,-համոզմունք է հայտնել Քոչարյանը։

Հանրահավաքից հետո «Հայաստան» դաշինքի անդամները լուսանկարվել և զրուցել են քաղաքացիների հետ։

Մայիսի 8-ից մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրապայքարին մասնակցում է 18 քաղաքական ուժ՝ 2 դաշինք և 16 կուսակցություն։ «Հայաստան» դաշինքը խորհրդարանական ընտրություններին մասնակցում է 17 համարի ներքո՝ «Միասին կարող ենք» կարգախոսով։ Դաշինքի կազմում միավորված են Հայ Հեղափոխական Դաշնակցություն և «ԱռԱջ» կուսակցությունները։ Դաշինքը ԿԸՀ է ներկայացրել 213 թեկնածուից բաղկացած ցուցակ և ազգային փոքրամասնությունների 4 թեկնածուից բաղկացած ցուցակ։