1 րոպեի ընթերցում
Երևանում մեկնարկել են Մոսկվա կինոթատրոնի ամառային դահլիճի վերականգնման աշխատանքները, որոնց նպատակն է տարածքին վերադարձնել նրա պատմական կերպարն ու մշակութային միջավայրի ամբողջականությունը՝ ազատելով այն տարիների ընթացքում ձևավորված խոչընդոտներից և ոչ նպատակային կառուցապատումներից։
«Արմենպրես»-ի փոխանցմամբ՝ այս մասին տեսանյութ է հրապարակել Երևանի քաղաքապետ Տիգրան Ավինյանը։ Նրա խոսքով՝ այսօր իրականացվում են նախկին սրճարանի քանդման աշխատանքները, որը երկար տարիներ փակել էր ամառային դահլիճի մուտքը և խաթարել տարածքի ճարտարապետական ու գործառնական ամբողջականությունը։
Քանդման գործընթացը մեկնարկային փուլն է լայնածավալ վերականգնման ծրագրի, որի շրջանակում նախատեսվում է ամառային դահլիճի վերականգնումը նախագծային և գեղագիտական ամբողջական լուծումներով։ Նախաձեռնության նպատակն է տարածքն ազատել ավելորդ կառուցապատումից և այն վերածել ժամանակակից պահանջներին համապատասխանող բաց ու հասանելի հանրային միջավայրի։
Այսպիսով, Մոսկվա կինոթատրոնի տարածքն աստիճանաբար վերադառնալու է իր պատմական կերպարին՝ վերականգնելով քաղաքի մշակութային կարևոր միջավայրերից մեկի նշանակությունը։