ԱՊՀ գլխավոր քարտուղարը համոզված է, որ Հայաստանը մոտ ապագայում չի անդամակցի ԵՄ-ին և կմնա ԵԱՏՄ-ում ու ԱՊՀ-ում
1 րոպեի ընթերցում
ԱՊՀ գլխավոր քարտուղար Սերգեյ Լեբեդևը հայտարարել է, որ Հայաստանը մոտ ապագայում չի անդամակցի Եվրամիությանը և կշարունակի մնալ Եվրասիական տնտեսական միության և Անկախ պետությունների համագործակցության անդամ։
«Եվրամիություն նրանք չեն գնա, դա մոտ ապագայում չի լինելու։ Ոչ, չեն գնա»,- «Արմենպրես»-ի հաղորդմամբ՝ Life-ի հետ զրույցում ասել է Լեբեդևը։
Նա նաև դրական պատասխան է տվել այն հարցին, թե արդյոք Հայաստանը կմնա ԵԱՏՄ-ի և ԱՊՀ-ի անդամ։
«Եվ ԱՊՀ-ում կմնա։ Դա հաստատ է»,- ընդգծել է ԱՊՀ գլխավոր քարտուղարը։
Ավելի վաղ, ՀՀ վարչապետ Նիկոլ Փաշինյանը հայտարարել էր, որ Հայաստանը չի պատրաստվում դուրս գալ ԵԱՏՄ-ից և շարունակելու է օգտագործել Միությունում իր ներգրավվածությունը երկրի տնտեսական շահերը պաշտպանելու համար։ Իսկ Աստանայում կայացած ԵԱՏՄ բարձրագույն խորհրդի նիստում Հայաստանի փոխվարչապետ Մհեր Գրիգորյանը վերահաստատել էր Հայաստանի պատրաստակամությունը շարունակել բարեխղճորեն մասնակցել Միության աշխատանքներին՝ փոխադարձ հարգանքի, հավասար գործընկերության և անդամ պետությունների ազգային շահերի հաշվառման հիման վրա։