1 րոպեի ընթերցում
Կալիֆոռնիայի դատարանը մերժել է Tesla, SpaceX, xAI և այլ ընկերությունների ղեկավար Իլոն Մասկի հայցն ընդդեմ արհեստական բանականության հետազոտությամբ զբաղվող OpenAI ընկերության։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Դաշնային ատենակալները միաձայն վճռել են, որ ամերիկացի միլիարդատերը բաց է թողել հայցադիմում ներկայացնելու վաղեմության ժամկետը։
2024 թվականին ներկայացրած դատական հայցում Մասկն OpenAI-ին, դրա գործադիր տնօրեն Սեմ Ալթմանին և նախագահ Գրեգ Բրոքմանին մեղադրել էր իրեն մանիպուլյացիայի ենթարկելու համար՝ ստիպելով 38 միլիոն դոլար տրամադրել, սակայն հետագայում, ըստ Մասկի, ընկերությունը շեղվել է մարդկությանն օգուտ բերելու և շահույթ չհետապնդելու իր սկզբնական առաքելությունից և տասնյակ միլիարդ դոլար ընդունել Microsoft-ից և այլ ներդրողներից։ Մասկի պնդմամբ՝ OpenAI-ը նաև առաջնահերթություն չի տվել արհեստական բանականության անվտանգությանը։
OpenAI-ը հիմնադրվել է Ալթմանի, Մասկի և մի քանի այլ անձանց կողմից 2015 թվականին։ Մասկը լքել է ընկերության խորհուրդը 2018 թվականին, և հաջորդ տարի OpenAI-ը ստեղծել է շահույթ հետապնդող բիզնես։