1 րոպեի ընթերցում
Իրանի արտաքին գործերի նախարար Աբբաս Արաղչին Իսլամաբադում չի պլանավորում հանդիպումներ անցկացնել ամերիկացի բանակցողների հետ։ «Արմենպրես»-ի փոխանցմամբ՝ այս մասին X միկրոբլոգում հայտարարել է Իրանի արտաքին գործերի նախարարության խոսնակ Էսմայիլ Բաղային։
«Իրանի և ԱՄՆ-ի միջև հանդիպում չի նախատեսվում։ Իրանի դիտարկումները կփոխանցվեն Պակիստանին»,-նշվել է գրառման մեջ։
Նաև նշվել է, որ նախարար Արաղչին կհանդիպի Պակիստանի բարձրաստիճան պաշտոնյաների հետ՝ նրանց միջնորդական ջանքերի շրջանակներում Ամերիկայի կողմից պարտադրված պատերազմի դադարեցման և տարածաշրջանում խաղաղության վերականգնման նպատակով։
Ավելի վաղ տեղեկություններ էին հաղորդվել, որ Իրանի արտաքին գործերի նախարար Աբբաս Արաղչին մեկնում է Իսլամաբադ, Մասկատ և Մոսկվա։ Այցի նպատակն է երկկողմ խորհրդակցություններ անցկացնել և քննարկել տարածաշրջանում տեղի ունեցող զարգացումները, ինչպես նաև «ԱՄՆ-ի և Իսրայելի իշխանությունների կողմից Իրանին պարտադրված պատերազմի վերջին զարգացումները»։