3 րոպեի ընթերցում
Լոռու մարզի Փամբակ համայնքի Ձորագետ բնակավայրում պաշտոնապես բացվել է ներառական բազմաֆունկցիոնալ հանրային տարածք, որը միտված է համայնքային կյանքի ակտիվացմանը, երիտասարդների ներգրավվածության բարձրացմանը և սոցիալական համախմբվածության խթանմանը։
«Արմենպրես»-ի հաղորդմամբ՝ նախաձեռնությունն իրականացվել է ՄԱԶԾ «Դիմակայունություն ի սկզբանե» ծրագրի շրջանակում՝ Սերբիայի կառավարության ֆինանսական աջակցությամբ և ՀՀ տարածքային կառավարման և ենթակառուցվածքների նախարարության հետ համագործակցությամբ։
Հայաստանում ՄԱԶԾ մշտական ներկայացուցիչ Նաթիա Նացվլիշվիլին ընդգծեց ծրագրի կարևորությունը՝ նշելով, որ նմանատիպ տարածքները նպաստում են սոցիալական համախմբվածության ամրապնդմանը և ապահովում անվտանգ ու ներառական միջավայր ինչպես տեղական բնակիչների, այնպես էլ Լեռնային Ղարաբաղից տեղահանված անձանց համար։
«Նորաբաց տարածքը կընդլայնի կրթական և մշակութային նախաձեռնությունների հասանելիությունը՝ ապահովելով թատերական, արվեստի և ստեղծարար այլ խմբակների գործունեությունը ավելի քան 7000 բնակիչների համար, որոնցից 58 տոկոսը կանայք և երեխաներ են։ Տարածքը նախագծվել է մասնակցային գործընթացների միջոցով՝ ապահովելով կանանց և խոցելի խմբերի, այդ թվում՝ փախստականների ներգրավվածությունը տեղական որոշումների կայացման գործընթացներում»,- նշեց նա։
Լոռու մարզպետի տեղակալ Արսեն Ղարիբյանը, խոսելով ծրագրի կարևորության մասին, ընդգծեց, որ նման նախաձեռնությունները մեծ դեր ունեն համայնքների զարգացման և երիտասարդների ակտիվացման գործում։ Նրա խոսքով՝ Ձորագետում ստեղծված կենտրոնը նոր հնարավորություններ կբացի երիտասարդների համար և կնպաստի նրանց ստեղծարար ներուժի բացահայտմանը։
«Այս կենտրոնը կարևոր հարթակ է համայնքի երիտասարդների համար։ Ստեղծվել է հետաքրքիր և ժամանակակից միջավայր, որը հնարավորություն կտա նրանց զարգացնել գաղափարներ, ձեռք բերել նոր հմտություններ և արդյունավետ կազմակերպել ազատ ժամանակը։ Նման ծրագրերը կարևոր են ոչ միայն մարզի, այլև ամբողջ երկրի զարգացման տեսանկյունից»,- ասաց Դարբինյանը։
Նա նաև հավելեց, որ մինչ կենտրոնի ստեղծումը համայնքում նմանատիպ տարածք չի եղել, ինչի պատճառով երիտասարդները հաճախ այցելել են հարակից բնակավայրեր՝ զբաղվածություն ապահովելու նպատակով։
Հայաստանում Սերբիայի դեսպան Տատյանա Պանայոտովիչ-Ցվետկովիչը նշեց, որ ծրագիրն իրականացվել է Սերբիայի կառավարության կողմից հատկացված ֆինանսավորման շրջանակում, որն ուղղված է Հայաստանում տարբեր զարգացման նախաձեռնությունների աջակցմանը։
«Սա այն պահն է, երբ մենք տեսնում ենք մեր աշխատանքի արդյունքները Հայաստանում։ Այս տարածքը ստեղծում է նոր հնարավորություններ համայնքի բնակիչների համար, հատկապես՝ երիտասարդների։ Մեզ համար կարևոր է աջակցել Հայաստանի զարգացմանը տարբեր ուղղություններով, և նման ծրագրերը դրա լավագույն օրինակներից են։ Երեխաների ժպիտներն ու համայնքի բնակիչների դրական արձագանքը մեր աշխատանքի ամենամեծ արդյունքն են»,- ընդգծեց դեսպանը։