Հայաստանի բռնցքամարտիկները նախապատրաստվում են աշխարհի գավաթի խաղարկությանը

Հայաստանի բռնցքամարտի կանանց և տղամարդկանց թիմերի անդամները վերջին հավաքներն են անցկացնում Բրազիլիայում կայանալիք աշխարհի գավաթի խաղարկությունից առաջ:

«Այժմ վերջին տեխնիկատակտիկական պատրաստությունն են անցկացնում Բրազիլիայում կայանալիք աշխարհի գավաթի խաղարկությունից առաջ: Մեր բռնցքամարտիկները լավ են նախապատրաստվել: Գավաթի այս խաղարկությունում 1/8 եզրափակիչ դուրս գալու դեպքում նոր իրավունք կստանանք մասնակցելու հաջորդ` Չինաստանում կայանալիք փուլին: Եվ չինական փուլում էլ քառորդ եզրափակիչ հասնելու դեպքում իրավունք կտրվի մասնակցելու եզրափակչին, որը կայանալու է Տաշքենդում»,-«Արմենպրես»-ի հաղորդմամբ` լրագրողների հետ հանդիպման ժամանակ ասաց Հայաստանի բռնցքամարտի հավաքականի գլխավոր մարզիչ Ռուդիկ Մկրտչյանը:

Վերջինիս խոսքով` բռնցքամարտիկների համար այս տարվա կարևորագույն մրցաշարը սեպտեմբերին կայանալիք Եվրոպայի առաջնությունն է:

«Հիմա փոփոխվել են քաշային կարգերը ու 13 փոխարեն այժմ ունենք 10 քաշային կարգ: Երկու կամ երեք մրցաշարից հետո մեր բռնցքամարտիկները կգտնեն իրենց նոր քաշային կարգերում»,-առանձնացրեց մասնագետը:

Աշխարհի գավաթին կմասնակցեն Անուշ Գրիգորյանը (51 կգ), Էլիդա Քոչարյանը (65 կգ),  Ռուդոլֆ Գարբոյանը (50 կգ), Ժիրայր Սարգսյանը (55 կգ), Արթուր Բազեյանը (60 կգ), Արթուր Սահակյանը (65 կգ), Արարատ Հարությունյանը (70 կգ), Նարեկ Մանասյանը (90 կգ) և Դավիթ Չալոյանը (+90 կգ)։ Աշխարհի գավաթի խաղարկության հերթական փուլը կկայանա Բրազիլիայում ապրիլի 20-26-ը: