Ամփոփվել է Ժամանակակից երաժշտության փառատոնը

Լեհական երաժշտությանը նվիրված հատուկ համերգով եզրափակվել է Ժամանակակից երաժշտության փառատոնը։ Համերգն անցկացվել է Հայաստանում Լեհաստանի դեսպանության հետ համագործակցությամբ։

«Արմենպրես»-ի հաղորդմամբ՝ համերգին ելույթ է ունեցել Հայաստանի պետական սիմֆոնիկ նվագախմբի երաժիշտներից կազմված «Միրզոյան» լարային քառյակը՝ Տիգրան Մաթևոսյան (1-ին ջութակ), Իվանե Եսայան (2-րդ ջութակ), Արմեն Թորոսյան (ալտ), Հայկ Բաբայան (թավջութակ) կազմով։

Հնչել են Գրաժինա Բացևիչի թիվ 3 լարային կվարտետը, Քշիշտոֆ Պենդերեցկու Կլարնետ կվարտետը (կլարնետահար՝ Ավետիք Ղազարյան), Վիտոլդ Լուտոսլավսկու ջութակի և դաշնամուրի համար «Ռեչիտատիվո է արիոզո» ստեղծագործությունը (Իվանե Եսայան՝ ջութակ և Անահիտ Դիլբարյան՝ դաշնամուր), Կարոլ Շիմանովսկու թիվ 1 լարային կվարտետը։

Այս տարի Ժամանակակից երաժշտության փառատոնի շրջանակում կայացել է 7 համերգ՝ սիմֆոնիկ և կամերային։ Հնչել են համաշխարհային և հայաստանյան բազմաթիվ պրեմիերաներ։

Փառատոնը հիմնադրվել է Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի կողմից՝ հայ դասական և արդի կոմպոզիտորական արվեստը հայ ունկնդրին ներկայացնելու առաքելությամբ։ Փառատոնի նպատակն է հանրահռչակել հայ կոմպոզիտորական արվեստը, ինչպես նաև հայ և արտասահմանյան ժամանակակից կոմպոզիտորների ստեղծագործությունները։

Փառատոնն անցկացվել է ՀՀ կրթության, գիտության, մշակույթի և սպորտի նախարարության աջակցությամբ և Հայաստանի կոմպոզիտորների միության հետ համատեղ։ Փառատոնի ռազմավարական գործընկերն է GTB Holdings ընկերությունը։

Հայաստանում Լեհաստանի դեսպանության և Հայաստանի ֆոնդային բորսա և Կենտրոնական դեպոզիտարիայի (AMX) շնորհիվ նվագախումբը հասանելիություն է ստանում լեհ կոմպոզիտորների ստեղծագործությունների պարտիտուրներին։