ԵՄ-ն պատրաստվում է Մերձավոր Արևելքից անօրինական միգրացիայի. Տուսկ

Եվրամիությունը պատրաստվում է դիմակայել Մերձավոր Արևելքից զանգվածային անօրինական միգրացիային: Ինչպես «Արմենպրես»-ը տեղեկանում է «ՌԻԱ Նովոստի» գործակալությունից, այդ մասին լրագրողներին հայտնել է Լեհաստանի վարչապետ Դոնալդ Տուսկն՝ ամփոփելով մարտի 19-ին Բրյուսելում կայացած ԵՄ գագաթնաժողովի արդյունքները:

«Միգրացիայի հարցի շուրջ նոր ձայն է ի հայտ եկել։ Մենք քննարկումներ անցկացրինք մի խումբ երկրներում, որտեղ Իտալիայի և Դանիայի վարչապետների հետ միասին մեր գործընկերներին համոզեցինք, որ միանշանակ հայտարարվի, որ Եվրամիությունը Մերձավոր Արևելքում պատերազմի և աշխարհաքաղաքական ճգնաժամի պատճառով բաց չի լինի բոլոր նրանց համար, ովքեր ցանկանում են գաղթել։ Մեզ հաջողվել է Եվրահանձնաժողովին և մյուս գործընկերներին համոզել, որ չենք կրկնի 2015 թվականի սխալները», - ասել է Տուսկը։

Դրա հետ մեկտեղ նա նշել է, որ դեռևս դժվար է ասել, թե Մերձավոր Արևելքում տեղի ունեցող իրադարձություններն ինչպես կազդեն միգրացիայի հետ կապված իրադրության վրա։

«Հարցը շատ լուրջ է. մենք դեռ չենք կարող կանխատեսել Մերձավոր Արևելքում պատերազմի հետևանքները, այդ թվում՝ դրա միգրացիոն հետևանքները։ Ուստի այն հայտարարությունը, որ Եվրոպան փակ կլինի և հասանելի չի լինի անօրինական միգրանտների համար, շատ իրական է թվում», - ասել է Տուսկը։

ԱՄՆ-ն և Իսրայելն Իրանի դեմ համատեղ ռազմական գործողություն են սկսել փետրվարի 28-ից՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը, հերքելով մեղադրանքները, սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին։ Հարվածներից տուժել են Քուվեյթը, Կատարը, ԱՄԷ-ն, Սաուդյան Արաբիան, Օմանը, Բահրեյնը, Իրաքը։