2 րոպեի ընթերցում
Արտակ Ադամյանը որոշել է այլևս չշարունակել աշխատանքը Հայաստանի կանանց ֆուտբոլի ազգային հավաքականում։
«Արմենպրես»-ի հաղորդմամբ` այս մասին հայտնում է ՀՖՖ-ն:
ՀՖՖ-ն շնորհակալություն է հայտնել Արտակ Ադամյանին՝ կանանց Հայաստանի ազգային հավաքականի գլխավոր մարզչի պաշտոնում կատարած պրոֆեսիոնալ և նվիրված աշխատանքի համար։ «Արտակ Ադամյանի գլխավորությամբ մեր ընտրանին մեկ քայլ առաջ կատարեց՝ պաշտոնական խաղերում գրանցելով իր առաջին հաղթանակը և ցույց տալով, որ կանանց ֆուտբոլը Հայաստանում զարգացման մեծ ներուժ և խոստումնալից հեռանկար ունի։ Նրա նպատակասլաց և հետևողական աշխատանքի շնորհիվ թիմը կայացավ, և ամուր հիմքեր ստեղծվեցին հետագա հաջողությունների համար։ Այս ամենը հաշվի առնելով՝ համոզված եմ, որ կանանց ազգային հավաքականը նոր հաջողություններ է ունենալու նաև Արտակ Ադամյանի ստեղծած հիմքի շնորհիվ։Վստահ եմ, որ նրա ներդրած ջանքերը դրական ազդեցություն կունենան Հայաստանում կանանց ֆուտբոլի զարգացման գործում։Մաղթում եմ Արտակ Ադամյանին նոր հաջողություններ մարզչական կարիերայում»,-հայտարարել է ՀՖՖ նախագահ Արմեն Մելիքբեկյանը։
Հայաստանի ֆուտբոլի կանանց ազգային հավաքականը ԱԱ 2027-ի որակավորման փուլում ընդգրկված է C լիգայի C6 խմբում։ Մեկնարկային խաղում ընտրանին 0:3 հաշվով զիջել է Ղազախստանին: Թիմի հաջորդ հանդիպումը ապրիլի 14-ին է։ Երևանում ընտրանին կխաղա Բելառուսի դեմ: