Քաղաքաշինության կոմիտեի նախագահը հանդիպել է Կոտայքի մարզի Նաիրի համայնքի բնակիչների և ոլորտային մասնագետների հետ

ՀՀ քաղաքաշինության կոմիտեի նախագահ Եղիազար Վարդանյանը և Կոտայքի մարզպետ Ահարոն Սահակյանը Նաիրիի համայնքապետարանում նախաձեռնել են բնակիչների և համայնքի ոլորտային մասնագետների հետ հանդիպում՝ ներկայացնելու քաղաքաշինության բնագավառի բարեփոխումներն ու քննարկելու նրանց հետաքրքրող ոլորտային հարցերը:

«Արմենպրես»-ի հաղորդմամբ՝ այս մասին տեղեկացնում են Քաղաքաշինության կոմիտեի մամուլի ծառայությունից։

Հանդիպմանը Եղիազար Վարդանյանը կարևորել է մարզային հանդիպումները՝ քաղաքաշինական գործընթացների մասին իրազեկելու և գործնականում հանդիպող խնդիրները վերհանելու նպատակով։ «Կոմիտեն գնում է քաղաքաշինական բոլոր գործընթացների թվայնացման ճանապարհով։ Մեկնարկել ենք քաղաքաշինական ընթացակարգերի կանոնակարգման, պարզեցման և հստակեցման համալիր բարեփոխումներ, որոնք կնպաստեն քաղաքաշինական գործունեության իրականացման համար նպաստավոր պայմանների ստեղծմանը»,-ընդգծել է Եղիազար Վարդանյանը և տեղեկացրել, որ urban-permits.e-gov.am հարթակով իրականացվող քաղաքաշինական փաստաթղթերի տրամադրման գործընթացից հետո թվային հարթակ են տեղափոխվելու նաև հողամասերի նպատակային նշանակության փոփոխության և համալիր փորձաքննության գործընթացները։

Հանդիպման ընթացքում ցուցադրվել են քաղաքաշինական կադաստրի հնարավորությունները, որոնց մշակումն ակտիվ փուլում է։ Այն հնարավորություն կտա տեղեկատվություն ստանալ տարածքի քաղաքաշինական սահմանափակումների և կառուցապատման չափորոշիչների մասին։

Կոմիտեի նախագահը հանդիպման մասնակիցներին իրազեկել է, որ անհատական բնակելի տների կառուցման դեպքում ներդրվել է պարզեցված ընթացակարգ, պարզեցվել են հողամասերի նպատակային նշանակությունների փոփոխություններին առնչվող կարգավորումները և սահմանվել նախագծերի քաղաքաշինական պետական համալիր փորձաքննության սեղմ ժամկետներ։

Քաղաքաշինության կոմիտեի նախագահը պատասխանել է քաղաքացիների և համայնքի քաղաքաշինության ոլորտի պատասխանատուներին հետաքրքրող մի շարք հարցերի, որոնց մի մասի կարգավորման ուղղությամբ կոմիտեն արդեն քայլեր է ձեռնարկել։

Հանդիպմանը մասնակցել են նաև կոմիտեի նախագահի տեղակալ Նունե Պետրոսյանը, խորհրդական Հովսեփ Հովեյանը, Նաիրի համայնքի ղեկավարի առաջին տեղակալ Կարեն Հարությունյանը, վարչական շրջանների ղեկավարները և ոլորտային պատասխանատուները։