Զելենսկու գրասենյակը հաստատել է Ուկրաինայի մասնակցությունը Ժնևում ՌԴ-ի և ԱՄՆ-ի հետ բանակցություններին

Ուկրաինայի նախագահ Վոլոդիմիր Զելենսկու գրասենյակը հայտարարել է, որ Ուկրաինան կմասնակցի Ժնևում եռակողմ բանակցություններին։ «Արմենպրես»-ի փոխանցմամբ՝ այս մասին հայտնել է Ուկրաինայում BBC-ի թղթակիցը։

Նախագահական գրասենյակը հաստատել է, որ Ուկրաինայի, Ռուսաստանի և Միացյալ Նահանգների միջև եռակողմ բանակցությունների նոր փուլը տեղի կունենա փետրվարի 17-18-ին։

Կրեմլի խոսնակ Դմիտրի Պեսկովը նույնպես նշել էր, որ բանակցությունները տեղի կունենան փետրվարի 17-18-ին, Ժնևում։ Ռուսական պատվիրակությունը կգլխավորի ՌԴ նախագահի օգնական Վլադիմիր Մեդինսկին։

Իր հերթին, Ուկրաինայի Ազգային անվտանգության խորհրդի քարտուղար Ռուստեմ Ումերովը հայտարարել է, որ բանակցային խմբում իրենից բացի կլինեն նաև նախագահի գրասենյակի ղեկավար Կիրիլ Բուդանովը, Ուկրաինայի զինված ուժերի գլխավոր շտաբի պետ Անդրեյ Գնատովը, «Ժողովրդի ծառա» իշխող կուսակցության խմբակցության ղեկավար Դավիդ Արախամիան, Բուդանովի տեղակալ Սերգեյ Կիսլիցան և Հետախուզության գլխավոր վարչության պետի տեղակալ Վադիմ Սկիբիցկին։

Ռուսաստանի, Ուկրաինայի և ԱՄՆ-ի մասնակցությամբ անվտանգության հարցերով եռակողմ խորհրդակցությունների առաջին փուլը տեղի է ունեցել հունվարի 23-24-ն Աբու Դաբիում: Ռուսական բանակցային խումբը գլխավորել է Ռուսաստանի զինված ուժերի Գլխավոր շտաբի Հետախուզության գլխավոր վարչության պետ Իգոր Կոստյուկովը:

Փետրվարի 4-5-ը Աբու Դաբիում տեղի է ունեցել Ռուսաստանի, ԱՄՆ-ի և Ուկրաինայի եռակողմ բանակցությունների երկրորդ փուլը, որից հետո կողմերը ռազմագերիների փոխանակում կատարեցին «157-ը 157-ի դիմաց» սկզբունքով։