Գավառ, Սևան և Ճամբարակ համայնքներում արդեն հայտնի են ներքին ուղևորափոխադրում իրականացնող կազմակերպությունների անունները
2 րոպեի ընթերցում
Գեղարքունիքի մարզի Գավառ, Սևան և Ճամբարակ համայնքներում նախորդ տարվա վերջին կայացել են ներքին փոխադրումների իրականացման նպատակով հայտարարված մրցույթները, որոնց արդյունքներով արդեն հայտնի են հաղթող կազմակերպությունները, որոնք առաջիկայում պետք է իրականացնեն ներքին ուղևորափոխադրումները։
Ինչպես «Արմենպրես»-ի թղթակցին տեղեկացրեց Գեղարքունիքի մարզպետ Կարեն Սարգսյանը, ներքին ուղևորափոխադրումների իրականացման համար Գավառ համայնքում մրցույթը հայտարարվել է մեկ առանձին, իսկ Սևան ու Ճամբարակ համայնքի համար՝ մեկ ընդհանուր փաթեթով։ «Գավառտրանս» ՍՊԸ-ն սպասարկելու է Գավառ համայնքի, իսկ «Արևափայլ» ՍՊԸ-ն՝ Սևան և Ճամբարակ համայնքների ներքին ուղևորափոխադրումները։
Այժմ հաղթող կազմակերպություններում ընթանում են տրանսպորտային միջոցների ձեռքբերման աշխատանքներ, մինչև հունիս ամիսը նշյալ համայնքներում կտրվի ներքին ուղևորափոխադրումների գործընթացի մեկնարկը։
Իսկ ահա Վարդենիս և Մարտունի համայնքների ներքին ուղևորափոխադրումների համար վերջին տարիներին հայտարարված մի քանի մրցույթներում մասնակիցներ չլինելու պատճառով համայնքապետարանների ենթակայությամբ ստեղծվում են փակ բաժնետիրական ընկերություններ, որոնք և համապատասխան տրանսպորտային միջոցներ ձեռք բերելուց հետո իրականացնելու են երթուղային գծերի սպասարկումը։