1 րոպեի ընթերցում
ՄԱԿ-ի «Պարենի համաշխարհային ծրագրի» կողմից 2024 թվականին հաստատված ծրագրի շրջանակներում արևային ֆոտովոլտային կայաններ են տեղադրվում Գեղարքունիքի մարզի հանրակրթական 26 դպրոցներում։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, 2026 թվականի փետրվարի 12-ի դրությամբ տարբեր հզորությունների արևային ֆոտովոլտային կայաններ են տեղադրվել Գանձակի թիվ 2, Գեղարքունիքի, Ծովինարի, Սևանի թիվ 1, Մեծ Մասրիկի, Ծաղկունքի, Մարտունու թիվ 2, Ծովագյուղի, Շողակաթի, Ծափաթաղի, Այրքի, Արեգունու, Թթուջրի, Ջիլի, Զովաբերի, Այգուտի, Գեղամասարի դպրոցներում։ Դրանց գումարային ընդհանուր հզորությունը կազմում է 498,310 կիլովատտ ժամ։ Այդ կայաններն արդեն միացված են ընդհանուր ցանցին։
Ընթացքի մեջ են գտնվում Նորատուսի թիվ 2, Նորատուսի թիվ 3, Նորաշենի, Կարմիրգյուղի թիվ 1, Ճամբարակի թիվ 2, Լանջաղբյուրի, Կարճաղբյուրի, Ծովազարդի միջնակարգ դպրոցներում արևային ֆոտովոլտային կայանների տեղադրման աշխատանքները, որոնց ընդհանուր հզորությունը շահագործումից հետո կկազմի 279,65 կիլովատտ ժամ։