Գեղարքունիքի մարզի բարձրլեռնային բնակավայրեր տանող ճանապարհների ձնամաքրման և մշակման աշխատանքները շարունակվում են
1 րոպեի ընթերցում
Գեղարքունիքի մարզում վերջին երկու օրերին տեղացող ձյունը, որն ուղեկցվում է նաեւ բքով, դժվարանցանելի, որոշ տեղերում նույնիսկ անանցանելի վիճակ է ստեղծում բարձրլեռնային մի շարք բնակավայրեր տանող ավտոճանապարհներին։
Ինչպես «Արմենպրես»-ը տեղեկացավ Մարտունու և Վարդենիսի համայնքապետարանների աշխատակազմերից, մի շարք ուղղություններում՝ Վերին Գետաշեն-Մադինա, Մաքենիս-Ախպրաձոր, Կութ-Ազատ-Նորաբակ, Վարդենիս-Արք-Վերին Շորժա հատվածներում երեկվանից ընթացել ու շարունակվում են ճանապարհների մաքրման ու մշակման աշխատանքները ձյան բարձր շերտից։ Դատելով լուսանկարներից ու տեսանկարահանումներից՝ ձյան բարձրությունը որոշ տեղերում հասնում է մինչև 1-1,5 մետրի։ Ճանապարհները սպասարկող կազմակերպությունների կողքին մաքրման աշխատանքներում ներգրավված են նաև Մարտունի և Վարդենիս համայնքների կոմունալ սպասարկման գրասենյակների տեխնիկական միջոցները։
Արվում է հնարավորը՝ բքառատ ու ձնառատ եղանակի պայմաններում ճանապարհների անցանելիությունն ապահովելու համար։