2 րոպեի ընթերցում
Պաշտպանության նախարար Սուրեն Պապիկյանն Ազգային ժողովում անդրադարձել է ընդդիմության կողմից հնչող քննադատություններին զինծառայողների վարձատրության վերաբերյալ։
«Հասկանում եմ, որ ընդդիմության գործը քննադատելն է, բայց երբ խոսում եք հավասարությունից, այո՛, բանակում շատ կարևոր է օրենքի առաջ բոլորի հավասար լինելը, բայց նույնքան կարևոր է, որ մարդիկ իրենց աշխատանքի և պատրաստության մակարդակին համապատասխան գումար ստանան»,- «Արմենպրես»-ի հաղորդմամբ՝ հայտարարեց Պապիկյանը։
Նախարարի խոսքով՝ հնարավոր չէ նույն կերպ գնահատել «պարզապես համազգեստ հագնող» և բարձր պատրաստվածություն ու պատրաստակամություն ունեցող զինվորականին։
Նա անդրադարձել է նաև այն հարցին, թե ինչու են հատուկ նշանակության ստորաբաժանումների զինծառայողները ավելի բարձր վարձատրվում, քան թիկունքային աշխատողները։
«Պատճառը ռիսկայնությունն է, կյանքի հետ կապված ռիսկերով պայմանավորված գործոնը, ֆիզիկական պատրաստվածության մակարդակը»,-նշել է նախարարը՝ ընդգծելով, որ տարբերությունը պայմանավորված է ծառայության բնույթով և վտանգավորության աստիճանով։
Պապիկյանի խոսքով՝ ներկայում ստեղծված համակարգերը և մեխանիզմները հավասարապես հասանելի են բոլոր զինծառայողների համար, և չկա զինվորական, ով բարձր պատրաստվածություն ունի, բայց չի գնահատվում կամ չի վարձատրվում։
Նախարարն անդրադարձավ նաև զինվորական համազգեստի և կոշիկների թեմային՝ արձագանքելով ընդդիմության քննադատություններին։
«Մեր նոր համակարգով բոլորը միանման են լինելու, միագույն են լինելու։ ՆԱՏՕ-ական բանակներում ևս նույն կոշիկները տարբեր երանգներ են ունենում, բայց մենք անցնում ենք միասնական համակարգի»,– ասաց Պապիկյանը՝ հավելելով, որ առաջիկայում հնարավորություն կլինի առավել մանրամասն ներկայացնել կատարվող փոփոխությունները։