ՀՀ և ԱՄՆ համագործակցությունը խաղաղաբեր է. Փաշինյան

Հայաստանի Հանրապետության և Ամերիկայի Միացյալ Նահանգների համագործակցության առանցքում մեկ նպատակ կա՝ խաղաղությունն ու կայունությունը։ «Արմենպրես»-ի փոխանցմամբ՝ այս մասին ԱՄՆ փոխնախագահ Ջեյ Դի Վենսի հետ համատեղ հայտարարությունների ընթացքում հայտնեց Հայաստանի վարչապետ Նիկոլ Փաշինյանը՝ պատասխանելով ամերիկացի լրագրողի հարցին։

«Մեր բոլոր գործողությունները և համագործակցությունը Միացյալ Նահանգների հետ ուղղված են խաղաղությանը և կայունությանը, և ես համոզված եմ, որ այդ նպատակն իրագործելի է։ Մենք արդեն տեսնում ենք, որ շատ կարևոր է արձանագրել, որ այն խաղաղությունը, որ 2025 թվականի օգոստոսի 8-ին հռչակվեց, ինքն արդեն գետնի վրա, իրականության մեջ արտահայտվում է, և Միացյալ Նահանգների և Հայաստանի համագործակցությունը խաղաղաբեր համագործակցություն է և այդպիսին կլինի միշտ»,- նշեց վարչապետը։

ԱՄՆ փոխնախագահ Ջեյ Դի Վենսը պաշտոնական այցով Հայաստան է ժամանել փետրվարի 9-ին։ ԱՄՆ փոխնախագահը Հայաստան է ժամանել կնոջ և երեխաների հետ։ Այցի շրջանակում տեղի է ունեցել Հայաստանի վարչապետ Նիկոլ Փաշինյանի և ԱՄՆ փոխնախագահ Ջեյ Դի Վենսի առանձնազրույցը։