Դատապարտյալների փոխանցումը Սիրիային իրականացվել է երկկողմ հարաբերությունների և հայ համայնքի իրավունքների նկատառումներով․ նախարար
2 րոպեի ընթերցում
Արդարադատության նախարար Սրբուհի Գալյանը պարզաբանում է ներկայացրել Սիրիայի Արաբական Հանրապետությանը դատապարտյալների փոխանցման վերաբերյալ՝ ընդգծելով, որ գործընթացը իրականացվել է օրինական կառուցակարգերի շրջանակում և քաղաքական ու հումանիտար նկատառումներով։
«Այդ անձինք փոխանցվել են դատապարտյալների փոխանցման կառուցակարգով՝ պայմանով, որ շարունակեն կրել իրենց նկատմամբ նշանակված պատիժը։ Գործընթացը կարգավորվել է համապատասխան օրենքով և իրականացվել է փոխադարձության սկզբունքի հիման վրա»,– «Արմենպրես»-ի հաղորդմամբ՝ մամուլի ասուլիսի ժամանակ նշել է նախարարը։
Սրբուհի Գալյանի խոսքով՝ փոխանցման որոշումը կայացվել է՝ գնահատելով Հայաստանի առջև առկա օբյեկտիվ հնարավորությունները։
«Այն արվել է նաև Սիրիայի հետ հարաբերությունները բարելավելու և Սիրիայում ապրող հայ համայնքի իրավունքների պաշտպանությունն ավելի արդի դարձնելու նպատակով»,– ընդգծեց նա։
Նախարարը հայտնեց, որ քննարկվել են նաև այլ հնարավոր ճանապարհներ, տարածաշրջանային հարաբերությունների զարգացման համատեքստում և օբյեկտիվ հնարավորությունների գնահատման արդյունքում ընտրվել է հենց Թուրքիայի ճանապարհը։
«Վստահաբար, որևէ արգելք չկա դատապարտյալների փոխանցումն այլ պետության միջոցով իրականացնելու համար»,– նշեց Գալյանը։
ՀՀ արդարադատության նախարարությունը հայտնել էր, որ Հայաստանում ցմահ ազատազրկման դատապարտված Սիրիայի Արաբական Հանրապետության քաղաքացիներ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին 2026 թվականի հունվարի 14-ին Թուրքիայի Հանրապետության միջոցով փոխանցվել են Սիրիայի իրավասու մարմիններին։
«Փոխանցումն իրականացվել է համապատասխան իրավասու մարմինների միջև համագործակցության և կիրառվող իրավական մեխանիզմների շրջանակում՝ դատավճիռների հետագա կատարումը քաղաքացիության երկրում շարունակելու նպատակով»,– նշված էր նախարարության հաղորդագրությունում։