Գրենլանդիայի շուրջ բանակցություններում պետք է հաշվի առնվի մեր տարածքային ամբողջականությունը. Դանիայի վարչապետ

Դանիայի վարչապետ Մետտե Ֆրեդերիկսենը հայտարարել է, որ Դանիան և Գրենլանդիան բաց են Արկտիկայի անվտանգության վերաբերյալ կառուցողական երկխոսության համար, եթե քննարկումները հարգեն իր երկրի տարածքային ամբողջականությունը։ Ինչպես հաղորդում է «Արմենպրես»-ը, այս մասին հայտնում է Reuters-ը։

Ֆրեդերիկսենը նշել է, որ Դանիայի դիրքորոշումը ամբողջությամբ հստակ է ՆԱՏՕ-ի համար, և որ իրեն տեղեկացրել են, որ նախօրեին ԱՄՆ նախագահ Դոնալդ Թրամփի հետ Հյուսիսատլանտյան դաշինքի գլխավոր քարտուղար Մարկ Ռյուտեի բանակցությունները չեն վերաբերել իր երկրի ինքնիշխանությանը։

«Արկտիկայում անվտանգությունը ամբողջ ՆԱՏՕ-ի դաշինքի գործն է։ Հետևաբար, լավ և բնական է, որ այն քննարկվում է նաև ՆԱՏՕ-ի գլխավոր քարտուղարի և Միացյալ Նահանգների նախագահի միջև։

Դանիայի Թագավորությունը ցանկանում է շարունակել կառուցողական երկխոսությունը դաշնակիցների հետ այն մասին, թե ինչպես կարող ենք ամրապնդել Արկտիկայում անվտանգությունը, այդ թվում՝ Միացյալ Նահանգների «Ոսկե գմբեթի» համատեքստում, եթե, իհարկե, դա արվի՝ հաշվի առնելով մեր տարածքային ամբողջականությունը», - ասել է Ֆրեդերիկսենը։

Իսկ Դանիայի խորհրդարանի գրենլանդացի անդամ Աայա Քեմնիցն ասել է, որ ոչինչ չի կարող որոշվել առանց Գրենլանդիայի մասնակցության։

«ՆԱՏՕ-ն ոչ մի կերպ չունի միակ մանդատ՝ բանակցելու որևէ հարցի շուրջ՝ առանց մեզ՝ Գրենլանդիայի», - ասել է նա։

Միացյալ Նահանգների նախագահ Դոնալդ Թրամփը հայտարարել է, որ ՆԱՏՕ-ի գլխավոր քարտուղար Մարկ Ռյուտեի հետ հանդիպման արդյունքներով ձևավորվել է Գրենլանդիայի ու, ըստ էության, ամբողջ Արկտիկական շրջանի հետ կապված ապագա գործարքի շրջանակը։

«Այս լուծումը, եթե այն իրագործվի, հիանալի կլինի Ամերիկայի Միացյալ Նահանգների և ՆԱՏՕ-ի բոլոր երկրների համար։ Այս փոխըմբռնման հիման վրա ես չեմ կիրառի այն մաքսատուրքերը, որոնք նախատեսվում էր ուժի մեջ մտցնել փետրվարի 1-ից»,- հայտնել է Թրամփը։ Խոսքը ավելի վաղ հայտարարված  10% ներմուծման մաքսատուրքի մասին է, որը պետք է գանձվեր Մեծ Բրիտանիայից, Գերմանիայից, Դանիայից, Նիդեռլանդներից, Նորվեգիայից, Ֆինլանդիայից, Ֆրանսիայից և Շվեդիայից։ Մաքսատուրքն ուժի մեջ էր մնալու այնքան ժամանակ, քանի դեռ չկար գործարք ԱՄՆ կողմից Գրենլանդիայի ամբողջական գնման վերաբերյալ։ Իսկ հունիսի 1-ին ակնկալվում էր բարձրացնել մաքսատուրքերը մինչև 25 տոկոս։

Թրամփը հայտնել է, որ իրենք եվրոպացի գործընկերների հետ կաշխատեն «Ոսկե գմբեթ» հակահրթիռային պաշտպանական համակարգերի ստեղծման շուրջ։