1 րոպեի ընթերցում
Ադրբեջանը գեներատորների և այլ սարքավորումների խմբաքանակ է ուղարկել Ուկրաինա՝ երկրի էներգետիկ ցանցում առկա ճգնաժամի ֆոնին։ «Արմենպրես»-ի փոխանցմամբ՝ այս մասին հաղորդում են ադրբեջանական լրատվամիջոցները։
Խմբաքանակն ուղարկվել է Ադրբեջանի էներգետիկայի նախարարության կողմից՝ նախագահ Իլհամ Ալիևի հրամանով։ Այն ներառում է 12 ցածր լարման արևային վահանակ, 11 գեներատոր և 27 000 մետր մալուխներ և լարեր։ Սարքավորումների ընդհանուր արժեքը գնահատվում է 1 միլիոն դոլար։
Ադրբեջանը մինչ օրս Ուկրաինային տրամադրել է 45 միլիոն դոլարի մարդասիրական օգնություն։
2025 թվականի վերջից ի վեր Ուկրաինայում, մասնավորապես Կիևում և հարակից շրջանում, ռուսական զանգվածային հարվածների պատճառով սրվել են էլեկտրաէներգիայի մատակարարման խնդիրները։ Կիևի քաղաքապետ Վիտալի Կլիչկոն կոչ է արել բնակիչներին հնարավորության դեպքում լքել մայրաքաղաքը՝ ջեռուցման և էլեկտրամատակարարման հետ կապված խնդիրների պատճառով։ Կլիչկոյի խոսքով՝ 2022 թվականի փետրվարից ի վեր, երբ Ռուսաստանը ռազմական գործողություններ սկսեց Ուկրաինայի դեմ, Կիևն առաջին անգամ է բախվել նման ծանր էներգետիկ ճգնաժամի։