3 րոպեի ընթերցում
Գեղարքունիքի մարզի Մարտունիի համայնքապետարանում տեղի է ունեցել համայնքի 2026 թվականի տարեկան բյուջեի նախագծի հանրային քննարկում, որը վարել է համայնքի ղեկավարի տեղակալ Արմեն Շահինյանը։
Ինչպես «Արմենպրես»-ին տեղեկացրին Մարտունիի համայնքապետարանի աշխատակազմից, քննարկմանը մասնակցել են համայնքապետարանի և համայնքային կառույցների ներկայացուցիչներ, երիտասարդներ, համայնքի բնակիչներ, շահագրգիռ անձինք:
Մարտունի համայնքի բյուջեն ներկայացրել է համայնքապետարանի աշխատակազմի ֆինանսատնտեսագիտական, եկամուտների հաշվառման և հավաքագրման բաժնի պետ Թաթուլ Դավթյանը։
Ըստ զեկուցողի՝ Մարտունի համայնքի վարչական բյուջեն 2026 թվականին կազմելու է 5 միլիարդ 588 միլիոն 560 հազար դրամ, որից համայնքի սեփական եկամուտները կկազմեն 1 միլիարդ 402 միլիոն 527 հազար դրամ, պետության կողմից տրված դոտացիան`4 միլիարդ 186 միլիոն 33 հազար դրամ։
Քննարկման ընթացքում ներկայացվել են բյուջեի նախագծի հիմնական ուղղությունները, նախատեսվող ծրագրերն ու առաջնահերթությունները։ Բյուջեի միջոցներն առավելապես կուղղվեն սոցիալ-տնտեսական ու կենսական նշանակության ծրագրերի իրականացմանը, ենթակառուցվածքների զարգացմանը, բնակչության կենսապայմանների բարելավմանը և տարբեր ոլորտներում առկա հիմնախնդիրների կարգավորմանը։
Քննարկման ընթացքում նշվել է նաև միջազգային կառույցների աջակցությամբ սարքավորումների և սպասարկող տեխնիկայի ձեռքբերման, Մարտունի քաղաքում երիտասարդական կենտրոնի տարածքի հիմնանորոգման և շահագործման, միջհամայնքային և ներքաղաքային հանրային տրանսպորտի, կեղտաջրերի 2 կենսաբանական մաքրման կայանների կառուցման, համայնքի բոլոր բնակավայրերում «Կոտայքի և Գեղարքունիքի ԿԿԹԿ»-ի միջոցով կենտրոնական աղբահանության կազմակերպման, Մարտունիի կենտրոնական գրադարանի վերակառուցման, Մարտունի քաղաքի և Ձորագյուղ բնակավայրի մանկապարտեզների շենքերի հիմնանորոգման և վերանորոգման աշխատանքների, Մարտունի քաղաքի գլխավոր մարզադաշտի կառուցման և ֆուտբոլային ակումբի հիմնման, «ԹՈՒՄՈ» ստեղծարարական տեխնոլոգիաների կենտրոնի հիմնման, սիրողական մարզաձևերի սպորտային համալիրի կառուցման, Մարտունի քաղաքի Գետափնյա -2 փողոցի երկայնքով գետեզերքին ճեմուղու կառուցման և նախատեսված այլ ծրագրերի մասին, որոնք նախատեսված է իրականացնել 2026 թվականի ընթացքում։