2 րոպեի ընթերցում
Վենեսուելայի արտաքին գործերի նախարարությունը հայտարարել է, որ ԱՄՆ-ն ռազմական գործողություններ է իրականացնում երկրի մայրաքաղաք Կարակասում, ինչպես նաև Միրանդա, Արագուա և Լա Գուաիրա նահանգներում։
«Արմենպրես»-ի հաղորդմամբ՝ Վենեսուելայի ԱԳՆ-ն Թելեգրամ ալիքում տարածած հայտարարության մեջ ռազմական ագրեսիա է որակել ԱՄՆ գործողությունները՝ հավելելով, որ այն ՄԱԿ-ի Կանոնադրության կոպիտ խախտում է, մասնավորապես՝ դրա 1-ին և 2-րդ հոդվածների, որոնք ամրագրում են պետությունների ինքնիշխանության հարգումը, իրավական հավասարությունը և ուժի կիրառման արգելքը։
Նշվում է, որ այդ գործողությունը սպառնում է միջազգային խաղաղությանն ու կայունությանը, հատկապես Լատինական Ամերիկայում և Կարիբյան տարածաշրջանում, և լուրջ վտանգի տակ է դնում միլիոնավոր մարդկանց կյանքը։
Ըստ հայտարարության՝ Վենեսուելայի նախագահ Նիկոլաս Մադուրոյի հրամանագրով երկրում արտակարգ դրություն է մտցվել՝ բնակչության իրավունքները պաշտպանելու, հանրապետական ինստիտուտների լիարժեք գործունեությունն ապահովելու և անհապաղ զինված պայքարի անցնելու համար։
Հունվարի 3-ին, Reuters-ը հղում անելով ամերիկացի անանուն պաշտոնյային, հայտնում է, որ ԱՄՆ-ն հարվածներ է հասցրել Վենեսուելայի տարածքում։
Ավելի վաղ հայտնի է դարձել, որ Վենեսուելայի մայրաքաղաք Կարակասի տարածքում, այդ թվում՝ ռազմական օբյեկտներում, մի շարք պայթյուններ են որոտացել։