Իրանի ԱԳՆ-ն մեկնաբանել է Թեհրանի հետ ռազմավարական գործընկերություն հաստատելու ցանկության մասին ՀՀ վարչապետի հայտարարությունը
2 րոպեի ընթերցում
Իրանը վճռական է տրամադրված շարունակել զարգացնել Հայաստանի հետ հարաբերությունները տարբեր ոլորտներում։
«Արմենպրես»-ի հաղորդմամբ՝ այս մասին հայտնում են իրանական լրատվամիջոցները՝ մեջբերելով երկրի արտաքին գործերի նախարարության խոսնակ Էսմայիլ Բաղայիի հայտարարությունը։
Անդրադառնալով Հայաստանի վարչապետ Նիկոլ Փաշինյանի՝ օրեր առաջ արված հայտարարությանը, որ Երևանը ցանկանում է Թեհրանի հետ ռազմավարական գործընկերության փաստաթուղթ ստորագրել՝ Բաղային նշել է, որ երկու երկրները շատ լավ հարաբերություններ ունեն։
«Մենք վճռականորեն տրամադրված ենք շարունակել այդ հարաբերությունները տարբեր ոլորտներում»,-ասել է Իրանի ԱԳՆ խոսնակը։
Նա ընդգծել է, որ Թեհրանն իր հարաբերությունները կարգավորում է ազգային շահերից ելնելով, և Հայաստանի հետ հարաբերություններն այդ առումով բացառություն չեն։
«Մեր հարաբերությունները հիմնված են փոխադարձ շահերի և խնդիրների, ու ընդհանուր շահերի հստակ ըմբռնման վրա»,-շեշտել է Բաղային։
Նա նաև հավելել է, որ Իրանը հարգում է այլ երկրների հետ հարաբերություններ ունենալու՝ պետությունների իրավունքը, քանի դեռ դա չի վնասում Թեհրանի հետ հարաբերություններին։